25 сентябрь, чоршанба куни соат 14:08 да «Қавола» МФЙда жойлашган «Зар мебел» оилавий корхонасига қарашли мебель ишлаб чиқариш цехида ёнғин содир бўлаётганлиги ҳақида Самарқанд шаҳар ёнғин-қутқарув хизматига хабар келиб тушган, деб ёзади ФВВ ЁХББ ОАВ билан ҳамкорлик қилиш бўлинмаси.
Хабар асосида ёнғинни бартараф этилишига тўртта ёнғин ўчириш бўлинмаси жалб этилган. Биринчи бўлинма воқеа жойига 12 дақиқада етиб борганда, «Зар мебель» ОКга қарашли мебел ишлаб чиқариш цехининг ички қисми қуюқ қора тутун билан қопланган ҳолда очиқ аланга билан ёнаётганлиги маълум бўлган. Ёнғин соат 14:45 да ўраб олиниб, 16:10 да бартараф этилган. Тан жароҳати олганлар ва ҳалок бўлганлар қайд этилмаган.
Ёнғин оқибатида ишлаб чиқариш цехининг 95 квадрат метр майдонда томи, ички қисми, жиҳозлари ва тайёр маҳсулотлари ёниб зарарланган. Ёнғиннинг тахминий сабаби ишлаб чиқаришда технологик регламентнинг бузилиши, деб баҳоланмоқда. Моддий зарар миқдори аниқланмоқда.
Изоҳ (0)