Россияда кўпхотинлиликни легаллаштириш кўплаб ижтимоий муаммоларни ҳал қилиш имконини берган бўларди. Бу ҳақда Москва муфтийси Ильдар Аляутдинов маълум қилди, дея хабар беради «РИА Новости».
«Кўпхотинлиликни албатта қонунийлаштириш зарур деб ҳисоблайман. Бу амалиёт ҳаётга татбиқ этилишга ҳақли. Устига-устак, айрим динлар, жумладан, Ислом ҳам бунга рухсат беради», — деди Аляутдинов.
Муфтий, статистика маълумотларига кўра, Россияда аёллар сони эркакларга нисбатан 10 миллионга кўп эканлигини ҳисобга олиш кераклигини айтди. Қолаверса, «аёллар бева бўлиб қолиши ёки ажралиши билан боғлиқ вазиятлар» ҳам кам эмас. Шунингдек, Татаристон, Чеченистон, Доғистон каби қатор минтақаларда кўпхотинлилик ҳолатлари мавжуд.
Москва мусулмонлари етакчиси мазкур масала фақат мутасадди идоралар томонидан уламоларни жалб этган ҳолда кўриб чиқилиши лозимлигини билдирди.
«Кўпхотинлилик ҳар бир томоннинг нафақат ҳуқуқлари, балки мажбуриятлари ҳам ҳисобга олиниши зарур бўлган мураккаб тизим. Бунда катта масъулият эркак кишига тушади: молиявий таъминот, оилаларга тенг вақт ажратиш, болалар тарбияси ва ҳоказо. Шу сабабли ҳар бир ҳолат алоҳида кўриб чиқилиши лозим», — таъкидлади Аляутдинов.
Маълумот учун, олдинроқ Россия мусулмонлари диний бошқармаси раҳбари шайх Равиль Гайнутдин ҳам мамлакатнинг мусулмонлар кўпчиликни ташкил этадиган минтақаларида кўпхотинлиликни қонунийлаштириш мақсадга мувофиқлигини билдирганди.
Изоҳ (0)