Rossiyada ko‘pxotinlilikni legallashtirish ko‘plab ijtimoiy muammolarni hal qilish imkonini bergan bo‘lardi. Bu haqda Moskva muftiysi Ildar Alyautdinov ma’lum qildi, deya xabar beradi “RIA Novosti”.
“Ko‘pxotinlilikni albatta qonuniylashtirish zarur deb hisoblayman. Bu amaliyot hayotga tatbiq etilishga haqli. Ustiga-ustak, ayrim dinlar, jumladan, Islom ham bunga ruxsat beradi”, — dedi Alyautdinov.
Muftiy, statistika ma’lumotlariga ko‘ra, Rossiyada ayollar soni erkaklarga nisbatan 10 millionga ko‘p ekanligini hisobga olish kerakligini aytdi. Qolaversa, “ayollar beva bo‘lib qolishi yoki ajralishi bilan bog‘liq vaziyatlar” ham kam emas. Shuningdek, Tatariston, Checheniston, Dog‘iston kabi qator mintaqalarda ko‘pxotinlilik holatlari mavjud.
Moskva musulmonlari yetakchisi mazkur masala faqat mutasaddi idoralar tomonidan ulamolarni jalb etgan holda ko‘rib chiqilishi lozimligini bildirdi.
“Ko‘pxotinlilik har bir tomonning nafaqat huquqlari, balki majburiyatlari ham hisobga olinishi zarur bo‘lgan murakkab tizim. Bunda katta mas’uliyat erkak kishiga tushadi: moliyaviy ta’minot, oilalarga teng vaqt ajratish, bolalar tarbiyasi va hokazo. Shu sababli har bir holat alohida ko‘rib chiqilishi lozim”, — ta’kidladi Alyautdinov.
Ma’lumot uchun, oldinroq Rossiya musulmonlari diniy boshqarmasi rahbari shayx Ravil Gaynutdin ham mamlakatning musulmonlar ko‘pchilikni tashkil etadigan mintaqalarida ko‘pxotinlilikni qonuniylashtirish maqsadga muvofiqligini bildirgandi.
Izoh (0)