Бухорода 20—21 сентябрь кунлари «Абу Али Ибн Сино ва замонавий тиббиёт» мавзусида Х Халқаро Ибн Сино ўқишлари илмий-амалий анжумани ўтказилди. Саккизта давлатдан, жумладан, Россия, Исроил, Қирғизистон, Ҳиндистон, Бангладеш, Озарбайжон, Тожикистон, Германия давлатларидан таниқли олимлар ташриф буюрди.
Анжуманнинг биринчи кунида Бухорога ташриф буюрган меҳмонларнинг Абу Али ибн Сино номидаги мемориал-музейига саёҳати уюштирилди.
– Абу Али ибн Сино мероси эзгуликка, ер юзидаги барча инсонларнинг саломатлигига хизмат қилаётган экан, демак, у умумбашар фарзанди, буюк сиймодир, – деди Исроилнинг «Авиценна» Халқаро жамғармаси президенти, профессор Михаэл Юревич Сач. – Ҳар йили буюк тиббиёт устози меросини ўрганишга бағишланган илмий-амалий анжуманни орзиқиб кутаман ва Бухоройи шарифга ошиқаман. Улуғ олим туғилган Афшона қишлоғида бўлганимиздан бениҳоя хурсандмиз. Бу ердаги музейни томоша қилиб, ўзбек халқининг Ибн Сино хотирасига бўлган меҳр-муҳаббатини, унинг меросини кўз қорачиғидек асраб-авайлашини кўриб, таҳсинлар айтамиз.
Шу куни Бухоро Ёшлар марказида матбуот анжумани ўтказилди. Бунда Ибн Сино жамоат фонди бошқаруви раиси Нозимхон Маҳмудов, академик Абдукарим Усмонхўжаев, Бухоро давлат тиббиёт институти ректори Амрилло Иноятов, хорижий меҳмонлар ҳамда ОАВ вакиллари иштирок этди.
Маълумотга кўра, бугунга қадар Ҳиндистон кутубхоналарида Ибн Сино меросига оид 25 мингта китоб ва 17 мингта журнал сақлаб келинмоқда. Журналистлар билан учрашувда айни кунларда улардан Ўзбекистонга нусхалар ҳамда қўлёзмалар олиб келиш чоралари белгиланаётгани хусусида сўз борди.
Матбуот анжуманида сўнгида Ибн Сино жамоат фонди ҳамда Абу Али ибн Сино номидаги Тошкент Стоматология институти ўртасида ҳамкорлик битими имзоланди.
Илмий-амалий анжуманнинг иккинчи кунида учрашувлар «Тиббиётга чет эл сармояси ва ноу-хаулар», «Замонавий тиббиётнинг долзарб муаммолари», «Ўзбекистон Республикасида халқ табобатини ҳуқуқий тартибга солиш ва ривожлантириш асослари», «Фармацевтика фани ривожида Ибн Сино ҳиссаси», «Ибн Сино соғлом овқатланиш таълимоти асосчиси» дея номланган секторларга бўлинган ҳолда давом эттирилди.
Германиялик тиббиёт фанлари доктори, профессорлар Муҳаммад Адам ҳамда Амина Атхер, ҳиндистонлик Абдур Рауф, Бангладешдан ташриф буюрган профессор Жаннат Оракатул, шунингдек, Тошкент врачлар малакасини ошириш институти кафедра мудири Мирза Ғофур Охунов ва бошқалар тадбир дастурига мувофиқ, ўндан ортиқ учрашув, илмий-услубий анжуман ва маҳорат дарсларини ўтди.
— Марказий Осиё халқлари маданиятини Ўрта аср шароитида дунё маданиятининг олдинги қаторига олиб чиққан буюк мутафаккирлардан бири Абу Али ибн Сино, маълумки, Европада Авиценна номи билан машҳур. Ўткир зеҳни, такрорланмас истеъдоди билан илм-фанни чуқур ўрганишга, ўзининг фалсафий ақл назарияси билан дунёни ҳайратда қолдирган буюк даҳо туғилиб ўсган бебаҳо тупроқни зиёрат айламак биз учун ҳам шараф, ҳам қувончдир, — деди ҳиндистонлик профессор ва доктор Саид Раҳмон Зиллур.
Куннинг иккинчи ярмида анжуман доирасида тиббиёт фанлари профессорлари, исроиллик Михаэл Сач ҳамда ҳиндистонлик Саид Раҳман Зиллурга Бухоро давлат Тиббиёт институтининг фахрий докторлик унвонлари ва олтин медаллари топширилди.
Изоҳ (0)