Buxoroda 20—21-sentabr kunlari “Abu Ali Ibn Sino va zamonaviy tibbiyot” mavzusida X Xalqaro Ibn Sino o‘qishlari ilmiy-amaliy anjumani o‘tkazildi. Sakkizta davlatdan, jumladan, Rossiya, Isroil, Qirg‘iziston, Hindiston, Bangladesh, Ozarbayjon, Tojikiston, Germaniya davlatlaridan taniqli olimlar tashrif buyurdi.
Anjumanning birinchi kunida Buxoroga tashrif buyurgan mehmonlarning Abu Ali ibn Sino nomidagi memorial-muzeyiga sayohati uyushtirildi.
– Abu Ali ibn Sino merosi ezgulikka, yer yuzidagi barcha insonlarning salomatligiga xizmat qilayotgan ekan, demak, u umumbashar farzandi, buyuk siymodir, – dedi Isroilning “Avitsenna” Xalqaro jamg‘armasi prezidenti, professor Mixael Yurevich Sach. – Har yili buyuk tibbiyot ustozi merosini o‘rganishga bag‘ishlangan ilmiy-amaliy anjumanni orziqib kutaman va Buxoroyi sharifga oshiqaman. Ulug‘ olim tug‘ilgan Afshona qishlog‘ida bo‘lganimizdan benihoya xursandmiz. Bu yerdagi muzeyni tomosha qilib, o‘zbek xalqining Ibn Sino xotirasiga bo‘lgan mehr-muhabbatini, uning merosini ko‘z qorachig‘idek asrab-avaylashini ko‘rib, tahsinlar aytamiz.
Shu kuni Buxoro Yoshlar markazida matbuot anjumani o‘tkazildi. Bunda Ibn Sino jamoat fondi boshqaruvi raisi Nozimxon Mahmudov, akademik Abdukarim Usmonxo‘jayev, Buxoro davlat tibbiyot instituti rektori Amrillo Inoyatov, xorijiy mehmonlar hamda OAV vakillari ishtirok etdi.
Ma’lumotga ko‘ra, bugunga qadar Hindiston kutubxonalarida Ibn Sino merosiga oid 25 mingta kitob va 17 mingta jurnal saqlab kelinmoqda. Jurnalistlar bilan uchrashuvda ayni kunlarda ulardan O‘zbekistonga nusxalar hamda qo‘lyozmalar olib kelish choralari belgilanayotgani xususida so‘z bordi.
Matbuot anjumanida so‘ngida Ibn Sino jamoat fondi hamda Abu Ali ibn Sino nomidagi Toshkent Stomatologiya instituti o‘rtasida hamkorlik bitimi imzolandi.
Ilmiy-amaliy anjumanning ikkinchi kunida uchrashuvlar “Tibbiyotga chet el sarmoyasi va nou-xaular”, “Zamonaviy tibbiyotning dolzarb muammolari”, “O‘zbekiston Respublikasida xalq tabobatini huquqiy tartibga solish va rivojlantirish asoslari”, “Farmatsevtika fani rivojida Ibn Sino hissasi”, “Ibn Sino sog‘lom ovqatlanish ta’limoti asoschisi” deya nomlangan sektorlarga bo‘lingan holda davom ettirildi.
Germaniyalik tibbiyot fanlari doktori, professorlar Muhammad Adam hamda Amina Atxer, hindistonlik Abdur Rauf, Bangladeshdan tashrif buyurgan professor Jannat Orakatul, shuningdek, Toshkent vrachlar malakasini oshirish instituti kafedra mudiri Mirza G‘ofur Oxunov va boshqalar tadbir dasturiga muvofiq, o‘ndan ortiq uchrashuv, ilmiy-uslubiy anjuman va mahorat darslarini o‘tdi.
— Markaziy Osiyo xalqlari madaniyatini O‘rta asr sharoitida dunyo madaniyatining oldingi qatoriga olib chiqqan buyuk mutafakkirlardan biri Abu Ali ibn Sino, ma’lumki, Yevropada Avitsenna nomi bilan mashhur. O‘tkir zehni, takrorlanmas iste’dodi bilan ilm-fanni chuqur o‘rganishga, o‘zining falsafiy aql nazariyasi bilan dunyoni hayratda qoldirgan buyuk daho tug‘ilib o‘sgan bebaho tuproqni ziyorat aylamak biz uchun ham sharaf, ham quvonchdir, — dedi hindistonlik professor va doktor Said Rahmon Zillur.
Kunning ikkinchi yarmida anjuman doirasida tibbiyot fanlari professorlari, isroillik Mixael Sach hamda hindistonlik Said Rahman Zillurga Buxoro davlat Tibbiyot institutining faxriy doktorlik unvonlari va oltin medallari topshirildi.
Izoh (0)