Жанубий кореялик мутахассислар Қамчиқ, Чорвоқ ва Сўқоқда янги метеоқурилмалар ўрнатди

Жанубий кореялик мутахассислар Тошкент яқинидаги тоғли ҳудудларда янги метеоқурилмалар ўрнатди. Бу ҳақда «Ўзгидромет» матбуот хизмати маълум қилди.

Кореянинг WeatherRia консалтинг компанияси ҳамда КЕITI экологик индустриал ва технологик институти вакиллари Тошкентга келди. Сафар «Ўзбекистонда сув ресурслари таъминоти учун қор қоплами сатҳини ўлчашнинг кўп нуқтали лазерли сканерлаш усулини ишлаб чиқиш» лойиҳасини амалга ошириш доирасида ташкил қилинди.

WeatherRia Корея метеорологик маъмурияти лицензиясига эга ягона компания бўлиб, мамлакат гидрометеорологик хизматини модернизациялаш ва такомиллаштиришда фаол иштирок этади. Компания дунёда биринчи бўлиб қор қоплами сатҳини кўп нуқтали автоматик лазерли ўлчагичини ишлаб чиққан. «Ўзгидромет» 2018 йилдан бери бу икки ташкилот билан ҳамкорликда кузатув тизимларини модернизациялаш лойиҳасини амалга ошириб келмоқда.

Кореялик мутахассисларнинг Ўзбекистонга сафари давомида Қамчиқ қор кўчки станциясига кўринувчанликни белгилайдиган, Чорвоқ ва Сўқоқ минтақавий участкаларига эса қор қатламини ўлчаш учун кўп нуқтали автоматик лазерли ўлчагич ўрнатилди. «Ўзгидромет» техник мутахассислари учун янги ўрнатилган қурилмаларда ишлаш бўйича машғулот ўтказилди.