Ўзбекистон ҳақида ноёб дастурлар тайёрлаш ҳамда уларни дунёнинг машҳур телеканалларида намойиш қилиш мақсадида TopGear, «Вокруг Света», National Geographic каби таниқли телеканал ва кўрсатувлар вакилларини Ўзбекистонга жалб қилиш режалаштирилмоқда. Бу ҳақда Туризмни ривожлантириш давлат қўмитаси хабар берди.
«Ахборот бозоридан фойдаланган ҳолда, мамлакат туристик салоҳиятини тезкор суръатларда ошириш мумкин, бу айниқса туристик реклама мақсадига етишиш учун муҳим. Шу муносабат билан Ўзбекистон имижини шакллантириш ҳамда унинг жаҳон бозорида танилишини ошириш мақсадида TopGear, ‘Вокруг Света’, National Geographic каби машҳур платформалар билан ҳамкорликда ишлаш ва Ўзбекистон ҳақида ноёб дастурлар тайёрлаш мамлакат туристик салоҳияти тарғиботида самарали ёндашув ҳисобланади», — дейилади хабарда.
Таъкидланишича, рекламанинг ушбу тури ҳар доим ахборот майдонининг бир қисми бўлиб қолади ва бу охир-оқибат турли платформалардан (телевизорлар, планшетлар, компьютерлар ва ҳ.к.) томоша қилувчи аудиториянинг юқори қамровига олиб келади.
Изоҳ (0)