Тошкентда 600 литр спиртни салкам 20 миллион сўмга сотган фуқаро қўлга олинди

Тошкентда фуқаро Анвар Икромов (исми ўзгартирилган) 600 литр этил спиртини бошқа бир фуқарога ноқонуний равишда сотаётган пайт қўлга олинган. Бу ҳақда «Дарё»га ҳуқуқ-тартибот органларидаги манбалари маълум қилди.

Қайд этилишича, «А.К.И» МЧЖ раҳбари Анвар Икромов спиртни жами 19,2 миллион сўмга Рустам Полвоновга (исми ўзгартирилган) сотган пайт воқеа жойида қўлга олинган. Анвар Икромовдан жами 23 миллион сўмлик 612 литр этил спирти ашёвий далил сифатида олиб қўйилган.

Ҳозирда Анвар Икромовга нисбатан Жиноят кодексининг тегишли моддаси билан жиноят иши қўзғатилиб, тергов ҳаракатлари бошлаб юборилган.