13—15 сентябрь кунлари Испания чемпионатида 4-тур учрашувлари бўлиб ўтди. «Дарё» одатга кўра тур тафсилотлари билан ўртоқлашади.

«Реал» — «Леванте»

Фото: Twitter

Бу турда «Реал» ўзи учун ноқулай рақиб ҳисобланган «Леванте» билан баҳс юритди. Таркибдаги йўқотишлар сабаб мадридликлар устози Зинедин Зидан ярим ҳимояда ротация қилиш имкониятига эга эмас эди. Ўйин қайдномасидан фақатгина учта (Каземиро, Тони Кроос, Хамес) марказ футболчилари ўрин олганди. Шундай бўлса-да, «қаймоқранглилар» ўйин томонлама ўзини яхши кўрсата олди. Айниқса биринчи бўлимда мадридликлар рақибга ҳеч қандай имконият бермади.

Мазкур ўйинда ёзги трансфер ойнасида «Челси»дан харид қилинган Эден Азар «Реал»даги расмий дебютини ўтказди. Танаффусдан сўнг «Реал» темпни бироз пасайтирди ва куч тежашга ҳаракат қилди. Буни эса меҳмонлар иккита гол билан жазолади. Эслатиб ўтамиз, 18 сентябрь, чоршанба куни Мадрид шаҳри клуби ЕЧЛ доирасида ПСЖга қарши баҳс олиб боради.

«Реал Сосьедад» — «Атлетико»

Фото: Twitter

Тур сенсацияси Сан-Себастьянда қайд этилди. «Реал Сосьедад» шу вақтгача очко йўқотмасдан келаётган «Атлетико»ни тўхтатишга эришди.

Учрашувда «Сосьедад»да ижара асосида ҳаракат қилаётган «Реал» футболчиси Мартин Эдегор ҳисобни очди, орадан кўп вақт ўтмай Начо Монреаль мезбонларнинг иккинчи голини урди. Бундан ташқари, иккинчи гол урилган вақтда мадридликлар посбони Ян Облак бошидан жароҳат олди ва ўйинни давом эттира олмади.

«Барселона» — «Валенсия»

Фото: Twitter

Шанба оқшомининг марказий учрашувида «Барселона» ва «Валенсия» жамоалари ўзаро баҳсга киришди. Лионель Мессининг йўқлиги, Суареснинг майдонга тушиши сўроқ остида тургани каталонияликлар клуби мухлисларини ташвишга солаётганди. Бироқ ўйиннинг илк дақиқаларидаёқ 16 ёшли иқтидор эгасининг ҳаракатлари «Камп Ноу»га йиғилган томошабинлар қўрқувини йўққа чиқарди.

Қанот ҳужумчиларининг жароҳати сабаб жиддий рақибга қарши ўйинда асосий таркибда майдонга туширилган Ансумане Фати 2-дақиқада валенсияликлар дарвозасини ишғол қилди. Орадан беш дақиқа ўтиб Фати Френки де Йонгнинг голига ассистентлик қилди.

Дастлабки дақиқалардаги қақшатқич «зарба»дан кейин меҳмонларнинг ўзига келиши қийин кечди. Тайм ўрталарига бориб Алберт Селадес шогирдлари олдинга ўта бошлади ва 27-дақиқада Родигонинг ажойиб узатмасидан кейин Кевин Гамейро ҳисобни қисқартирди. Бироқ «кўршапалаклар» иккинчи бўлим дебютини ҳам бой берди ва шундан кейин вазиятни ўнглаш жуда мураккаблашиб кетди. Луис Суареснинг майдонга тушиши барчасига мантиқий нуқтани қўйиб берди. Бу ўйинда «Барселона»дан «Валенсия»га ўтган дарвозабон Яспер Силессен ўзининг ишончсиз ҳаракатлари билан ёдда қолди.

«Алавес» — «Севилья»

Фото: Twitter

Ортда қолган тўртта турдан кейин пешқадамга айланиб олган «Севилья» сафарда ушбу мавсум ҳали мағлубиятга учрамаган «Алавес» билан баҳс юритди. Ўйинда катта устунликка эга бўлган меҳмонлар Хоан Хорданнинг ягона голи эвазига уч очкога эга бўлди.

Шу тариқа, «Атлетико»нинг очко йўқотганидан унумли фойдаланган Хулен Лопетеги шогирдлари биринчи ўринга кўтарилиб олди.

Қизиқарли фактлар ва тур рақамлари

  • Ансу Фатининг Ла Лигада 2 та гол уриши учун 3 та ўйин керак бўлди. Месси бу натижага эришиш учун 13 та ўйин сарфлаган эди.
  • Эден Азарнинг бошқа жамоалардаги («Лилль»,»Челси» ва Бельгия терма жамоаси) дебюти ғалаба билан тугамаган эди. Бироқ у мазкур нохуш анъанага «Реал»да барҳам берди.
  • Карим Бензема Ла Лига доирасида «Реал»нинг «Сантьяго Бернабеу»да урган сўнгги 10 та голидан 7 тасига муаллифлик қилди. Карим шулардан 4 та голни бош билан урди.
  • Турнир жадвалида дастлабки иккита ўринни эгаллаб турган «Севилья» ва «Атлетико» жамоалари тўртта турда бор-йўғи бештадан гол урди. 10-ўриндаги «Вильярреал» эса ўнта гол уришга эришган.

4-турга келиб мусобақада очко йўқотмаган жамоа қолмади. Учта жамоа («Леганес», «Эйбар», «Хетафе») ғалабага эриша олгани йўқ. Шунингдек, яна учта клуб дуранг нималигини билмай келмоқда («Леганес», «Леванте», «Атлетико»).

Ла Лига

4-тур баҳслари

13 сентябрь, жума

«Мальорка»—«Атлетик» 0:0

14 сентябрь, шанба

«Реал»—«Леванте» 3:2

Голлар: 1:0 — 25 Бензема, 2:0 — 31 Бензема, 3:0 — 40 Каземиро, 3:1 — 49 Майораль, 3:2 — 75 Мелеро

 «Леганес»—«Вильярреал» 0:3

Голлар: 0:1 — 26 Херар Морено, 0:2 — 39, автогол Сильва, 0:3 — 90 Херар Морено

«Реал Сосьедад»—«Атлетико» 2:0

Голлар: 1:0 — 58 Эдегор, 2:0 — 61 Монреаль

«Барселона»—«Валенсия» 5:2

Голлар: 1:0 — 2 Фати, 2:0 — 7 де Ёнг, 2:1 — 27 Гамейро, 3:1 — 51 Пике, 4:1 — 61 Суарес, 5:1 — 82 Суарес, 5:2 — 90 Макси Гомес

15 сентябрь, якшанба

«Вальядолид» — «Осасуна» 1:1

Голлар: 1:0 — 65 Эрвиас, 1:1 — 81 Ибанес.

«Сельта» – «Гранада» 0:2

Голлар: 0:1 — 45 Херман Санчес, 0:2 — 54 Эррера.

«Алавес» — «Севилья» 0:1

Гол: 0:1 — 37 Жордан

«Эйбар» — «Эспаньол» 1:2

Голлар: 1:0 — 58 Рамис, 1:1 — 76 Феррейра, 1:2 — 79 Гранеро

«Бетис» — «Хетафе» 1:1

Голлар: 0:1 — 15, пенальти Мата, 1:1 — 73, пенальти Хоакин

Мусобақа жадвали

Фото: Twitter

Тўпурарлар рўйхати

  1. Херар Морено («Вильярреал») — 5 та гол
  2. Карим Бензема («Реал») — 4 та гол
  3. Лоренцо Морон («Бетис») — 3 та гол
  4. Луис Суарес («Барселона») — 2 та гол
  5. Ансумане Фати («Барселона») — 2 та гол
  6. Антуан Гризманн («Барселона») — 2 та гол
  7. Серхио Гвардиола («Вальядолид») — 2 та гол
  8. Рохер Марти («Леванте») — 2 та гол
  9. Гарет Бэйл («Реал») — 2 та гол

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!