Azarning Madriddagi debyuti, “Atletiko”ni to‘xtatgan “Real” futbolchisi va Messining o‘rinini bildirmagan 16 yoshli futbolchi. La Ligada tur tafsilotlari

13—15-sentabr kunlari Ispaniya chempionatida 4-tur uchrashuvlari bo‘lib o‘tdi. “Daryo” odatga ko‘ra tur tafsilotlari bilan o‘rtoqlashadi.

“Real” — “Levante”

Bu turda “Real” o‘zi uchun noqulay raqib hisoblangan “Levante” bilan bahs yuritdi. Tarkibdagi yo‘qotishlar sabab madridliklar ustozi Zinedin Zidan yarim himoyada rotatsiya qilish imkoniyatiga ega emas edi. O‘yin qaydnomasidan faqatgina uchta (Kazemiro, Toni Kroos, Xames) markaz futbolchilari o‘rin olgandi. Shunday bo‘lsa-da, “qaymoqranglilar” o‘yin tomonlama o‘zini yaxshi ko‘rsata oldi. Ayniqsa birinchi bo‘limda madridliklar raqibga hech qanday imkoniyat bermadi.

Mazkur o‘yinda yozgi transfer oynasida “Chelsi”dan xarid qilingan Eden Azar “Real”dagi rasmiy debyutini o‘tkazdi. Tanaffusdan so‘ng “Real” tempni biroz pasaytirdi va kuch tejashga harakat qildi. Buni esa mehmonlar ikkita gol bilan jazoladi. Eslatib o‘tamiz, 18-sentabr, chorshanba kuni Madrid shahri klubi YChL doirasida PSJga qarshi bahs olib boradi.

“Real Sosyedad” — “Atletiko”

Tur sensatsiyasi San-Sebastyanda qayd etildi. “Real Sosyedad” shu vaqtgacha ochko yo‘qotmasdan kelayotgan “Atletiko”ni to‘xtatishga erishdi.

Uchrashuvda “Sosyedad”da ijara asosida harakat qilayotgan “Real” futbolchisi Martin Edegor hisobni ochdi, oradan ko‘p vaqt o‘tmay Nacho Monreal mezbonlarning ikkinchi golini urdi. Bundan tashqari, ikkinchi gol urilgan vaqtda madridliklar posboni Yan Oblak boshidan jarohat oldi va o‘yinni davom ettira olmadi.

“Barselona” — “Valensiya”

Shanba oqshomining markaziy uchrashuvida “Barselona” va “Valensiya” jamoalari o‘zaro bahsga kirishdi. Lionel Messining yo‘qligi, Suaresning maydonga tushishi so‘roq ostida turgani kataloniyaliklar klubi muxlislarini tashvishga solayotgandi. Biroq o‘yinning ilk daqiqalaridayoq 16 yoshli iqtidor egasining harakatlari “Kamp Nou”ga yig‘ilgan tomoshabinlar qo‘rquvini yo‘qqa chiqardi.

Qanot hujumchilarining jarohati sabab jiddiy raqibga qarshi o‘yinda asosiy tarkibda maydonga tushirilgan Ansumane Fati 2-daqiqada valensiyaliklar darvozasini ishg‘ol qildi. Oradan besh daqiqa o‘tib Fati Frenki de Yongning goliga assistentlik qildi.

Dastlabki daqiqalardagi qaqshatqich “zarba”dan keyin mehmonlarning o‘ziga kelishi qiyin kechdi. Taym o‘rtalariga borib Albert Selades shogirdlari oldinga o‘ta boshladi va 27-daqiqada Rodigoning ajoyib uzatmasidan keyin Kevin Gameyro hisobni qisqartirdi. Biroq “ko‘rshapalaklar” ikkinchi bo‘lim debyutini ham boy berdi va shundan keyin vaziyatni o‘nglash juda murakkablashib ketdi. Luis Suaresning maydonga tushishi barchasiga mantiqiy nuqtani qo‘yib berdi. Bu o‘yinda “Barselona”dan “Valensiya”ga o‘tgan darvozabon Yasper Silessen o‘zining ishonchsiz harakatlari bilan yodda qoldi.

“Alaves” — “Sevilya”

Ortda qolgan to‘rtta turdan keyin peshqadamga aylanib olgan “Sevilya” safarda ushbu mavsum hali mag‘lubiyatga uchramagan “Alaves” bilan bahs yuritdi. O‘yinda katta ustunlikka ega bo‘lgan mehmonlar Xoan Xordanning yagona goli evaziga uch ochkoga ega bo‘ldi.

Shu tariqa, “Atletiko”ning ochko yo‘qotganidan unumli foydalangan Xulen Lopetegi shogirdlari birinchi o‘ringa ko‘tarilib oldi.

Qiziqarli faktlar va tur raqamlari

• Ansu Fatining La Ligada 2 ta gol urishi uchun 3 ta o‘yin kerak bo‘ldi. Messi bu natijaga erishish uchun 13 ta o‘yin sarflagan edi.
• Eden Azarning boshqa jamoalardagi (“Lill”,”Chelsi” va Belgiya terma jamoasi) debyuti g‘alaba bilan tugamagan edi. Biroq u mazkur noxush an’anaga “Real”da barham berdi.
• Karim Benzema La Liga doirasida “Real”ning “Santyago Bernabeu”da urgan so‘nggi 10 ta golidan 7 tasiga mualliflik qildi. Karim shulardan 4 ta golni bosh bilan urdi.
• Turnir jadvalida dastlabki ikkita o‘rinni egallab turgan “Sevilya” va “Atletiko” jamoalari to‘rtta turda bor-yo‘g‘i beshtadan gol urdi. 10-o‘rindagi “Vilyarreal” esa o‘nta gol urishga erishgan.

4-turga kelib musobaqada ochko yo‘qotmagan jamoa qolmadi. Uchta jamoa (“Leganes”, “Eybar”, “Xetafe”) g‘alabaga erisha olgani yo‘q. Shuningdek, yana uchta klub durang nimaligini bilmay kelmoqda (“Leganes”, “Levante”, “Atletiko”).

Musobaqa jadvali

To‘purarlar ro‘yxati

1. Xerar Moreno (“Vilyarreal”) — 5 ta gol
2. Karim Benzema (“Real”) — 4 ta gol
3. Lorenso Moron (“Betis”) — 3 ta gol
4. Luis Suares (“Barselona”) — 2 ta gol
5. Ansumane Fati (“Barselona”) — 2 ta gol
6. Antuan Grizmann (“Barselona”) — 2 ta gol
7. Serxio Gvardiola (“Valyadolid”) — 2 ta gol
8. Roxer Marti (“Levante”) — 2 ta gol
9. Garet Beyl (“Real”) — 2 ta gol