Сульшер Лэмпардга қарши. «Манчестер Юнайтед»—«Челси» тўқнашуви ҳақида

Англия Премьер лигаси мухлисларни янги мавсум старти билан хурсанд қилибгина қолмай, балки илк турданоқ икки гранд жамоани «Олд Траффорд» учраштириб, футбол аҳлига катта спектаклни ҳадя этмоқда. Қуйида ушбу учрашувга оид қизиқарли маълумотларни биргаликда танишиб чиқишни тавсия қиламиз.

«Челси»

Ёзги трансферлар вақтида Лондоннинг «Челси» клуби кўплаб ўзгаришларни бошдан ўтказди. Жамоани илк мавсум Европа Лигаси ғолиблигига бошлаб борган Маурицио Сарри кўч-кўронини кўтариб, Туриннинг «Ювентус»ига ўтиб кетди. Унинг ўрнини эса клуб афсонаси, бир мавсум давомида Чемпионшип клуби — «Дерби Каунти»ни бошқарган Фрэнк Лэмпард эгаллади. «Дерби» Фрэнк қўл остида Премьер лигага қайтишига бир баҳя қолди. Клуб сўнгги босқичда «Астон Вилла»га имкониятни бой бериб, йўлланмадан қуруқ қолди. Бундан ташқари «аристократлар» учун энг катта йўқотиш — Эден Азарнинг «Реал»га ўтиб кетиши бўлди. 28 ёшли белгиялик футболчи сўнгги мавсумларда клубнинг яққол етакчисига айланганини кўрсата олганди. Энди эса Лондон клуби асосий юлдузи ва етакчисисиз ҳужумдаги муаммоларни ҳал этиши керак бўлади.

Фрэнк Лэмпард эса унинг учун энг асосийси — жамоага содиқ қолиш эканлигини таъкидлашдан чарчамаяпти. Агар футболчи клубда асосий таркиб учун курашишни хоҳламайдими, у бемалол кетиши мумкин. Гап ким ҳақида кетаётганлигини билдингиз — Давид Луис. Трансферлар ойнасининг сўнгги куни бразилиялик ҳимоячи Лондоннинг бошқа бир клуби «Арсенал»га ўтиб кетди. Лэмпард эса унинг кетишига ҳеч қандай қаршилик кўрсатмади. Энди эса «Челси»да бир неча йиллардан бери ўзини кўрсатиш имкониятидан маҳрум бўлиб келган Курт Зума Луиснинг йўқлигини билдирмасликка ҳаракат қилади. Ҳар ҳолда француз «Эвертон»даги ўйинлари орқали бунга етарли даражада қодирлигини ҳам кўрсата олди.

«Манчестер Юнайтед»

«Қизил иблислар» мураббий борасида ҳеч қандай ўзгаришларни амалга оширгани йўқ. Манкунианлар раҳбарияти Оле-Гуннар Сульшерга ишонишда давом этишини маълум қилди. Ва бу ишончини ёзги трансферлар ойнасида ҳам намойиш этди. Жумладан, «қизиллар» ўз сафини Аарон Уан-Биссака, Ҳарри Магуайр каби қимматбаҳо ҳимоячилар билан тўлдириб олди. Сульшер «Ливерпуль»да Виржил ван Дейк ҳимояни қандай тартибга солган бўлса, Магуайрнинг ҳам Манчестерда шундай иш қила олишига ишонмоқда. Буни эса вақт кўрсатиши табиий ҳол. Ван Дейк аллақачон ўзига сарланган миллионларни оқлаб юборди. Магуайр эса босимни енгиб ўтган ҳолда, нидерландияликдан қолишмаслигини исботлашга ҳаракат қилади.

«Юнайтед» трансферлар ойнасининг сўнгги кунида Ромелу Лукакуни «Интер»га сотиб юборди. Аммо клуб унинг ўрнига бирор ҳужумчини сотиб олмади. «Қизил иблислар» Маркус Рэшфорд ҳамда Антони Марсьяль белгиялик ҳужумчининг йўқлигини билдирмаслигига ишонмоқда.

Тахминий таркиблар

Қизиқарли маълумотлар

1. «Манчестер Юнайтед» барча мусобақлар доирасида сўнгги 6 та ўйиндан бери ўз майдонида «Челси»га мағлуб бўлмади;
2. АПЛнинг сўнгги 5 та ўйинида «Манчестер Юнайтед» ғалаба нималигини билмади;
3. «Манчестер Юнайтед» АПЛда мавсумни 26 марта ўз майдонида бошлаган. Шундан фақат битта ўйинда (2014/15 йилги мавсум «Суонси»га) мағлуб бўлган. 19 та ўйинда ғалаба, 6 та ўйинда эса дуранг;
4. «Челси» ва «Юнайтед» АПЛда мавсум дебютидаги ўйинларни энг кўп ютган икки клуб ҳисобланади. «Қизил иблислар»да 18 та, «аристократлар»да эса 17 та ғалаба;
5. Бу «Манчестер Юнайтед» ҳамда «Челси» учун аввал клубда ўйнаган футболчиларнинг эндиликда мураббий сифатида бир-бирига қарши илк ўйини бўлади. Сульшер—Лэмпард.
6. «Челси» «қизил иблислар» устидан «Олд Траффорд»да 6 марта ғалаба қозонган. Ҳар олтитасида ҳам Лондон клубини ҳар хил мураббий бошқарган.

Мураббийлар ўйиндан олдин

Мен Фрэнк Лэмпарднинг бизга қарши ўйнамаслигидан хурсандман. Агар у ўйнаганида, албатта, гол урган бўларди (кулади). Мен унга ҳар қандай мураббийга бўлгани каби муносабат билан ёндашаман. Энди биз ўйинчи эмас, балки мураббийлармиз.Оле-Гуннар Сульшер, «Манчестер Юнайтед» бош мураббийи

Клубдаги вазифаларимдан бири — атмосферани ҳис қилиб, керак бўлган вақтда зарур сўзларни топа олишдан иборат. Айни дамда тактика борасида ишларимиз якунига етди. Энди ҳаммаси уни амалга ошириш ва ишга бўлган муносабатни шакллантиришдан иборат. Ҳаммаси жамоавий меҳнатга боғлиқ.

Фрэнк Лэмпард, «Челси» бош мураббийи