Халқаро пресс-клубнинг навбатдаги сессиясида Президентнинг «Одам савдосига ва мажбурий меҳнатга қарши курашиш тизимини янада такомиллаштиришга оид қўшимча чора-тадбирлар тўғрисида»ги фармони мазмун-моҳияти ҳақида сўз борди.
Муҳокамада Олий Мажлис Сенати Раиси Танзила Норбоева, ички ишлар вазири Пўлат Бобожонов, Бандлик ва меҳнат муносабатлари вазири Шерзод Кудбиев, Бош прокурор ўринбосари Эркин Йўлдошев, Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши раиси Шавкат Жавлонов спикер сифатида қатнашди.
Таъкидланганидек, фармон билан одам савдосига қарши курашиш бўйича республика идоралараро комиссияси Одам савдосига ва мажбурий меҳнатга қарши курашиш миллий комиссияси этиб қайта ташкил қилинди. Миллий комиссия давлат органлари ва ҳудудий органлар, фуқароларнинг ўзини ўзи бошқариш органлари ва нодавлат нотижорат ташкилотларининг одам савдоси, мажбурий меҳнатга қарши курашиш соҳасидаги фаолиятини мувофиқлаштиради. Миллий қонунчиликни ва ҳуқуқни қўллаш амалиётини такомиллаштириш мақсадида айни соҳада давлат дастурлари ҳамда бошқа дастурларни ишлаб чиқади. Жиноятларни аниқлаш, тергов қилиш, олдини олиш ва уларга чек қўйиш амалиётини ўрганади.
Қайд этилишича, одам савдоси кўпроқ хотин-қизларни ўз гирдобига тортмоқда. Буни рақамлар ҳам исботлайди. 2018 йилнинг охири ва 2019 йилнинг олти ойида одам савдоси билан жиноят содир этгани учун 70 нафар шахс судланган. Уларнинг 55 нафари аёллар.
Мазкур иллат билан боғлиқ жиноятнинг яна бир асосий «аудиторияси« меҳнат муҳожирлари экани яхши маълум. Бугунги кунда чет элда 2 миллион 600 мингга яқин ўзбекистонлик меҳнат қилмоқда.
— Айни пайтда мамлакатда 81 та хусусий бандлик агентлиги фаолият юритмоқда, уларнинг 60 дан ортиғи Ўзбекистон фуқароларини чет элда ишга жойлаштириш бўйича лицензияга эга, — деди Бандлик ва меҳнат муносабатлари вазири Шерзод Кудбиев. — Аммо улар томонидан расмий равишда ишга жойлашганлар сони 3-3,5 мингдан ортмаяпти. Бу тизим биз учун янги. Шунинг учун одамларга таниш-билишдан кўра, хусусий бандлик агентликлари орқали пул тўлаб хорижга кетиш ишончли ва хавфсиз эканини тушунтиришимиз керак.
Вазирнинг маълум қилишича, фуқароларнинг ҳуқуқлари ва меҳнат фаолиятини муҳофаза қилиш мақсадида махсус фонд ташкил этилган. Мазкур фонд кўмагида ўтган йили Россия ИИВ Вақтинчалик сақлаш марказларида ушлаб турилган 1314 нафар ўзбекистонлик мамлакатга олиб келинди. Шунингдек, яқин вақт оралиғида қонунчиликка ҳам ўзгартиришлар киритилиши кўзда тутилмоқда. Бу ўзгартиришларда фуқароларни ёки ходимларини мажбурий меҳнатга жалб қилган масъул шахсларга нисбатан жиноий жавобгарлик белгиланиши назарда тутилган. Ҳозирча Ўзбекистонда бундай вазиятларда энг кам иш ҳақининг 3 баробарида маъмурий жазо қўлланилади.
Изоҳ (0)