Қашқадарё вилояти ИИБ Қарши туман ИИБ бошлиғи Баҳодир Арслоновнинг хатти-ҳаракатлари ҳақида сўз борган «‘Милиция бошлиғи уйимга бостириб кириб тинтув ўтказгач, болаларим қўрқиб кетган’. Қашқадарёлик фермер ИИБ бошлиқларининг навбатдаги зўравонлиги фош этди» номли мақолани рад этиб, туман ИИБ бошлиғининг шаъни ва қадр қимматини камситувчи дея баҳолади.
Вилоят ИИБ раддиясида шундай дейилади:
2019 йилнинг 21 июль куни тахминан соат 17:00 ларда туман ИИБ бошлиғига, туман ҳудудида вилоят раҳбарияти томонидан тумандаги қолоқ фермерлар билан ишлаш йўналишида йиғилиш ўтказилиши муносабати билан йиғилишда иштирок этиш учун туман ИИБ бошлиғининг секторида бўлган Чароғил ММТП ҳудудидаги «Паризода Рўзиқулова» фермер хўжалиги бошқарувчиси Бекзод Фармонов йиғилишга келишдан бош тортганлиги маълум қилинган.Эътибор беринг, фермер телефонда «йиғилишга бормайман», деган бир оғиз сўз учун туман ИИБ бошлиғи фермерни уйига излаб боряпти. Худдики, у жиноят қилдию, жиноятчини топиб келиши керакдек. Ҳали йиғилишга бормай қолмади. Бормайман деб айтди, холос. Ҳолбуки, йиғилиш кечки соат 18:30 да. Бир оғиз «бормайман» деган сўз ИИБ бошлиғининг шунча вақтини йўқотиб, фермер хонадонига келиб хонадонни кўздан кечиришига сабаб бўляпти. Демакки, туман ИИБ бошлиғи бекорчи бўлган деган хаёл ўтади кишидан. Йўқса, кимсан ИИБ бошлиғи телефонда айтилган бир оғиз сўзнинг кетидан қувиб шунча йўл босармиди? Шунчаки йиғилишга нега бормаслигининг сабабини билмоқчи бўлса, телефон орқали сўраса ҳам бўларди-ку.Мазкур ҳолатга аниқлик киритиш мақсадида туман ИИБ бошлиғи фуқаро Б.Фармоновнинг яшаш манзилига келиб, унинг турмуш ўртоғи М.Рўзиевадан унинг қаерда эканлигини сўраганидан сўнг, у турмуш ўртоғи Б.Фармоновга телефон қилган. Шу қўнғироқдан сўнг, Б.Фармонов уйига келганида, туман ИИБ бошлиғи у билан суҳбат ўтказиш жараёнида Б.Фармоновнинг ҳовлисида 10–15 та ёқилғи билан ифлосланган елим идишлар турганлигини кўриб, Б.Фармоновга давлат томонидан даладаги ғўзани культивация қилиш ишларида ишлайдиган техника учун ажратиладиган ёқилғидан белгиланган тартибда фойдаланмай, қонунга хилоф равишда ўтказишда ҳамда ёнғин хавфсизлиги талабларига риоя қилмаган ҳолда ёқилғи маҳсулотини уйида сақлаб турганлиги сабабли бу ҳолатга ҳуқуқий баҳо беришлик учун Б.Фармоновнинг яшаш манзилига туман ФВБ ёнғин хавфсизлиги инспекторини ҳамда Чароғил МФЙ раиси М.Эшмуродовни таклиф қилган.
Қолаверса, ИИБ бошлиғи фермер хонадонида ноқонуний сақланаётган ёқилғи борлигини қандай билди? Уйни тинтмаган бўлса? Бинобарин ёқилғи яширилмасдан ҳовлида сақланаётган экан, демакки, ёқилғи қуйиш шохобчаси талабга жавоб бермагани боис, фермер бу ишни очиқчасига қилган. Шу ўринда вилоят ИИБга бир савол: Ҳудуддаги ёқилғи қуйиш шохобчаси талабга жавоб бермагач, дала ишлари учун аталган ёнилғи қаерда сақланиши керак?
Муносабатга қайтамиз яна:
Ҳодиса жойига етиб келган туман ФВБ ёнғин хавфсизлиги инспектори Т.Саидов ўз навбатида Б.Фармонов томонидан яшаш хонадонида қонунга хилоф равишда ёқилғи сақланаётганлик ҳолатини ҳужжатлаштириши давомида Б.Фармонов «Сен мени уйимга бостириб киришга нима ҳаққинг бор», деб ҳолатни уяли телефонига тасвирга тушириш учун телефон аппаратини турмуш ўртоғи М.Рўзиевага берган. Ҳодиса жойини М.Рўзиева видео тасвирга олмаслиги ҳақида Чароғил МФЙ раиси М.Эшмуродов, Чароғил ММТП раиси Ш.Қиёмовлар айтиб огоҳлантиришларига қарамасдан у ўз ҳаракатини давом эттириб, ҳолатни зиддиятли кўринишга келтирувчи ҳаракатларни содир эта бошлаган. Фуқаро М.Рўзиева тегишли ҳужжатларни расмийлаштиришга тўсқинлик қилиб, телефонда тасвирга олишни давом эттиргани учун ундан телефон аппаратни тақдим қилиш сўралган.Бўлаётган жараённи телефонга тасвирга олиш тегишли ҳужжатларни расмийлаштиришга қандай қилиб халал бериши мумкин? ИИБнинг мазкур жумласи ҳам мақолада тилга олинган ҳолатни тасдиқлайди. Демакки, фермернинг аёли ИИБ назди билан айтганда қонуний хатти-ҳаракатни тасвирга ола бошлаган. ИИБ бошлиғи эса худди бошқарма бошлиқлари каби бу видеотасвирлар зиддиятли ҳолатни юзага келтиради деб ўйлаган (ёки қўрққан). Ва телефонни тортиб олган. Телефон тортиб олинганини ИИБнинг ўзи ҳам тасдиқлаяпти. ИИБ бошлиғи ўз ҳаракатининг қонунийлигига ишонса, нега телефонни тортиб олди? ИИБ бошлиғи сёмка қилинган видеотасвирдан нега бунчалик қўрқди? Телефонда ИИБ бошлиғини қўрқитадиган нима бор?
ИИБ бошқармасининг расмий муносабати шундай давом этади:
Мазкур ҳолатга бевосита Б.Фармонов аралашиб, зиддиятли ҳолатни давом эттириб, шу ерда бўлган фуқаролар орасида ёлғондан «нима учун хотинимни ураяпсан», деб ИИБ бошлиғига ташланиб, унинг эгнидаги хизмат кийими тугмаларини узиб, қўлини қайириб, уни ерга суриб йиқитиб, чап қўлига жароҳат етказган. Бундан фойдаланган М.Рўзиева эса ИИБ бошлиғининг қўлидаги телефон аппаратини тортиб олган.Қизиқ, вилоят ИИБ раҳбарияти шу чўпчакка ўзлари ишонармикин? Нега унда ИИБ бошлиғига куч ишлатган фермер ҳалиям тараллабедод қилиб юрибди?
«Фермер ИИБ бошлиғига куч ишлатганини шу ерда бўлган фуқаролар тасдиқлайди», — дейишибди.
Ҳа, ушбу воқеага гувоҳ бўлган Чароғил ҚФЙ раиси Миржамил Эшмуродов туман ИИБ бошлиғи қўл телефонини ўзи ерга уриб синдирганию, кўзойнагини ҳам ўзи улоқтирганини айтиб берганди. ИИБ яна куч ишлатиб раис фикрини ўзгартириб, бошқача талқин қилаётган бўлмаса, албатта.
Қашқадарё вилояти ИИБ раддияси сўнгида ҳозирги вақтда туман прокуратураси томонидан мазкур ҳолат юзасидан терговга қадар текширув ҳаракатлари ҳамда вилоят ИИБ томонидан эса хизмат текшируви ўтказилаётганини ёзибди. Ўйлаймизки, прокуратура тез орада ҳақиқатни ойдинлаштиради.
Изоҳ (0)