Ижтимоий тармоқларда жорий йил 1 августдан эътиборан юридик шахсларга тегишли автотранспорт воситаларини бошқараётган шахслар «Avtotest Report» МЧЖда малака оширишлари кераклиги тўғрисида ҳабарлар тарқалди.
Мазкур ҳабарларда асосан икки жиҳат:
юридик шахсларга тегишли автотранспорт воситаларини бошқараётган шахслар фақатгина «Avtotest Report» МЧЖда малака оширишдан норозилиги;
малака ошириш талабини барча юридик шахсларга эмас, балки юк ва йўловчиларни ташиш фаолиятини олиб борувчи юридик шахсларга тадбиқ этиш лозимлиги илгари сурилаётганлиги кузатилмоқда.
Мазкур вазият юзасидан Монополияга қарши курашиш қўмитаси қуйидагиларни билдирди.
«Avtotest Report» МЧЖ ва унга тегишли бўлган ташкилотларнинг Ўзбекистонда юридик шахсларга тегишли автотранспорт воситаларини бошқарадиган шахслар (ҳайдовчилар) малакасини ошириш фаолиятини юритиш бўйича алоҳида ҳуқуқи бекор қилинган.
Юридик шахсларга тегишли автотранспорт воситаларини бошқарадиган шахслар (ҳайдовчилар) Ўзбекистонда тегишли фаолиятни амалга ошириш ҳуқуқини берувчи лицензияга эга бўлган таълим муассасасида малакасини ошириш ҳуқуқига эга.
Шу билан бир қаторда, бугунги кунга қадар юридик шахсларнинг автомототранспорт воситалари ҳайдовчиларини малакаси ошириш фаолияти билан шуғулланиш ҳуқуқини берувчи лицензия талабларига фақатгина «Avtotest Report» МЧЖ ва унинг ҳудудлардаги филиаллари жавоб бериши аниқланди.
Шундан келиб чиққан ҳолда, «Avtotest Report» автомототранспорт воситалари ҳайдовчиларини малакаси ошириш фаолиятини кўрсатиш бозорида 1 йилдан ортиқ муддат фаолият олиб бораётганлиги инобатга олган ҳолда қўмита томонидан МЧЖни монополист корхоналар реестрига киритиш бўйича ўрганиш ва таҳлиллар ўтказилмоқда.
Бундан ташқари, юридик шахсларга тегишли автотранспорт воситаларини бошқараётган шахсларни икки йилда бир марта малака ошириш мажбурияти фақат юк ва йўловчиларни ташиш фаолиятини олиб борувчи юридик шахсларга эмас, балки ихтиёрида (балансида) автотранспорт воситаси мавжуд барча юридик шахсларга тадбиқ этилиши йўл ҳаракати хавфсизлигини, фуқаролар ҳаёти ва саломатлигини таъминлаш, йўл-транспорт ҳодисаларининг олдини олиш чораларини кучайтириш мақсадида қабул қилинган.
Мазкур талаб юридик шахсларнинг ҳуқуқ ва манфаатларига тўсқинлик қилаётган деган хулосага келган субъэктлар мажбуриятни бекор қилиш бўйича қонун ҳужжатини қабул қилган органга ёки Конституциявий судга мурожаат этиш ҳуқуқига эга.
Изоҳ (0)