Тошкент вилоятининг Ўртачирчиқ тумани «Пахтаобод» ҚФЙдаги «Кучлик» станцияси ҳудудида 2018 йилда (собиқ пахта тозалаш заводи ўрнида) хитойлик инвесторлар томонидан Сурхондарё вилояти ва Қорақалпоғистондан келтирилувчи қизилмия илдизларини қайта ишлаш бўйича «Агро Пекин» қўшма корхонаси ташкил этилган.
«Дарё»нинг Соғлиқни сақлаш вазирлигидаги манбасининг хабар беришича, ушбу қўшма корхона иш бошлаганидан сўнг жорий йилнинг март ойидан бошлаб юқоридаги аҳоли пунктида ҳудудга хос бўлмаган илонлар, чивинлар ва бошқа ҳашаротларнинг пайдо бўлгани аниқланган.
Шу билан бирга, аҳоли орасида чивин чақиши билан боғлиқ узоқ давом этувчи ярали ва йирингли тери касалликлари тарқалгани, унинг ўрнида чуқур чандиқлар қолиши ҳолатлари қайд этилмоқда. Корхона болалар боғчаси яқинида жойлашганини эътиборга олган ҳолда, ушбу касаллик аксарият ҳолларда болаларда кузатилмоқда.
Маҳаллий аҳолининг сўзларига кўра, қизилмия илдизини қайта ишлаш натижасида ҳосил бўлган кимёий моддалар белгиланган санитария талабларини бузган ҳолда ерга тўкилмоқда. Оқибатда бу аҳоли истеъмоли учун тортиб олинадиган ичимлик суви таркибига салбий таъсир қилмоқда.
Маҳалла вакиллари бу масала юзасидан бир неча марта корхона мутасаддиларига мурожаат қилган, аммо улар чора кўрмаган. Маҳаллий ҳокимият эса шикоятларга эътибор қаратмаган.
Юзага келган вазиятни ўрганиш мақсадида Соғлиқни сақлаш вазирлиги томонидан тиббий мутахассислар ва Республика давлат санитария-эпидемиология назорати маркази ходимларидан иборат ишчи гуруҳ тузилган.
Изоҳ (0)