Фарғона вилоятининг Қўштепа туманида 28 июль куни соат тахминан 22:30 ларда ЙТҲ юз берган. Фарғона вилояти ИИБдан олинган маълумотга кўра, Қўштепа тумани «Файз» МФЙда яшовчи 33 ёшли О.Р. бошқарувидаги «ВАЗ-2106» («Жигули») русумли автомашинасини «Қўштепа—Чимкент» йўлида ҳайдаб кетаётиб, қарама-қарши йўналишдан ҳаракатланиб келаётган Қўштепа тумани «Соҳибкор» МФЙда яшовчи 28 ёшли Р.О. бошқарувидаги Lacetti русумли автомашинаси билан тўқнашув содир этган.
«Дарё» манбасининг маълум қилишича, ЙТҲ оқибатида «Жигули» йўловчиси Қўштепа тумани «Янгиариқ» МФЙ Навниҳол кўчасида яшаган 48 ёшли Улуғбек Аҳмаджонов ҳаётдан кўз юмган. Дастлаб, Улуғбек Аҳмаджонов очиқ мия шикасти ташхиси билан Лангар ШТТЁМ жонлантириш бўлимига ётқизилган. Кўрсатилган тиббий муолажаларга қарамасдан, шифокорлар унинг ҳаётини сақлаб қола олмаган.
Расман тасдиқланмаган маълумотга кўра, Қўштепа тумани ободонлаштириш бўлимида ишлаган марҳум Улуғбек Аҳмаджонов ва унинг ҳамкасблари Риштон туманида ўтказилган ҳашардан қайтаётган бўлган. ЙТҲ натижасида тан жароҳати олиб, Лангар ШТТЁМга олиб келинган яна бир йўловчининг аҳволи оғир экани айтилмоқда. Шунингдек, Lacetti йўловчиси 1991 йилда туғилган Ш.Ю. ҳам даволаниш учун Лангар ШТТЁМга ётқизилган.
ЙТҲга Lacetti ҳайдовчисининг қарама-қарши ҳаракат йўлига чиқиб кетгани сабаб бўлган.
Ҳолат юзасидан 29 июль куни Lacetti ҳайдовчисига нисбатан Жиноят Кодексининг 266-моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) 1-қисми билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, 27–28 июль кунлари Фарғона вилоятининг Риштон туманида ҳашар ўтказилиб, унда бутун вилоятнинг шаҳар ва туманларидан 13562 нафар ҳашарчи иштирок этган. Бандлик ва меҳнат муносабатлари вазирлиги ушбу ҳашарни ноқонуний деб атаган.
Изоҳ (0)