Андижоннинг Хонобод шаҳрида туризм шаҳарчаси қурилмоқда

Андижон вилоятининг Хонобод шаҳридаги Хонтоғ қир-адирликларинг салкам 90 гектар қисмида ички ва ташқи туризмни ривожлантириш мақсадида ҳудудга келиб дам олувчилар учун хизмат қилувчи туризм шаҳарчаси бунёд этилмоқда. Бу «Дарё» мухбири хабар бермоқда.

Қурилиш штабининг маълум қилишича, қурилиш ишлари Ўзбекистон Президентининг Хонобод шаҳрида бўлиб, табиати бетакрор бу масканни сайёҳлик марказига айлантириш бўйича берган кўрсатмаларига асосан амалга оширилмоқда. Лойиҳага асосан, шаҳарчада дам олиш учун зарур бўлган 2 мингга яқин дала ҳовлилар, очиқ ва ёпиқ сув ҳавзалари, миллий чойхона ва замонавий ресторанлар, спорт майдонлари қуриб битказилади.

Айни пайтда бунёдкорлик ишлари билан бирга ҳудуд инфратузилмасини ривожлантириш мақсадида электр энергияси, ичимлик суви, табиий газ трубаларини тортиш ва бошқа шаҳарча инфратузилмасини яратиш бўйича кенг кўламли ишлар амалга оширилмоқда.

— Аввалига режалаштирилган сондаги ҳовлиларни қандай қилиб қурамиз, кимларга берамиз деб роса ўйландик, — дейди шаҳар ҳокими Мусахон Мамадалиев. – Ишонасизми, дача учун ер ажратмасангиз, бўлмайди, деяётганларнинг сони ортса ортмоқда, камаймаяпти. Улардан сабабини сўрасак, ҳудудни ҳавоси ёқаётганлигини айтишмоқда.

Маълумотларга кўра, яқин кунларда Хонтоғнинг яна 55–60 гектар қисмида инвестиция дастури доирасида европа андозалари асосида 1000 та замонавий дачаларни бунёд этиш ишлари бошланади. Уларни масъулияти чекланган жамият шаклидаги «СТС Андижон» Ўзбекистон–Озарбайжон қўшма корхонаси бинокорлари қуради.

— Андижонга аслида бир қатор инвестицион лойиҳаларни амалга ошириш учун келгандим, — дейди «СТС Холдинг Баку» лойиҳаси директори Аббос Ниязов. – Компаниямиз ҳамкори бўлган Ойбек Абдуғофуров вилоятнинг диққатга сазовор жойларига саёҳат уюштиришни таклиф қилди ва биз Хонободга келдик. Бу ердага жозибадорликни ва туристик манзил эканлигини кўриб, туристлар учун ҳамма қулайликларга эга меҳмонхоналар, яшаш жойлари ва бошқа иншоотлар қуриш бўйича янги ғоя пайдо бўлди. Вилоят раҳбарига мурожаат қилиб, лойиҳамизни кўрсатганимизда, у қўллаб-қувватлашга тайёрлигини билдирди. Ҳозирда бошланғич ишлар олиб борилмоқда.