Самарқанд вилоятида 2019 йилнинг 20 февраль куни Nexia автомобили ва Мидибус автобуси иштирокидаги йўл-транспорт ҳодисаси оқибатида Nexia йўловчиси ҳалок бўлган. Жиноят ишлари бўйича Жомбой тумани судида ҳайдовчиларнинг суди бўлиб ўтди.
Ҳодиса 20 февраль куни соат 14:00 атрофида Жомбой тумани Нўш маҳалласи ҳудудидан ўтувчи 4-Р 48 «Жомбой—Эшимоқсоқ» автомобиль йўли билан «Пайариқ—Жомбой» йўналишининг 11-километрида содир бўлган. Достон Суюнов бошқарувида бўлган Nexia автомашинаси билан Шаҳобиддин Кўбаев бошқарувчида бўлган, «Зилола Ўктам қизи» МЧЖга тегишли Мидибус русумли автобус йўл ҳаракати қоидаларини талабларини қўпол равишда бузган. Оқибатда Nexia автомашинасидаги йўловчи Р.Кубаева воқеа жойида вафот этган бўлса, йўловчилар Л.Абдумуродова, Ш.Файзуллаев ва Л.Усмоновалар турли хил даражадаги тан жароҳатлари олган.
Жиноят ишлари бўйича Жомбой тумани суди раиси М.Шерйигитовнинг «Дарё»га маълум қилишича, судланувчи Достон Суюнов Ўзбекистон Республикаси Жиноят Кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш) билан айбли деб топилиб 2 йил муддатга транспорт воситаларини бошқариш ҳуқуқидан маҳрум қилиниб, 2 йил 4 ой ахлоқ тузатиш ишлари жазоси тайинланган. Судланувчи Шаҳобиддин Кўбаев эса Ўзбекистон Республикаси Жиноят Кодекси 117-моддаси 2-қисми (Хавф остида қолдириш одам ўлимига олиб келиши) ва 266-моддаси 2-қисми билан айбли деб топилиб 3 йил муддатга транспорт воситаларини бошқариш ҳуқуқидан маҳрум қилиниб, 3 йил муддатга ахлоқ тузатиш ишлари жазоси тайинланган.
Изоҳ (0)