Andijon viloyatining Xonobod shahridagi Xontog‘ qir-adirliklaring salkam 90 gektar qismida ichki va tashqi turizmni rivojlantirish maqsadida hududga kelib dam oluvchilar uchun xizmat qiluvchi turizm shaharchasi bunyod etilmoqda. Bu “Daryo” muxbiri xabar bermoqda.
Qurilish shtabining ma’lum qilishicha, qurilish ishlari O‘zbekiston Prezidentining Xonobod shahrida bo‘lib, tabiati betakror bu maskanni sayyohlik markaziga aylantirish bo‘yicha bergan ko‘rsatmalariga asosan amalga oshirilmoqda. Loyihaga asosan, shaharchada dam olish uchun zarur bo‘lgan 2 mingga yaqin dala hovlilar, ochiq va yopiq suv havzalari, milliy choyxona va zamonaviy restoranlar, sport maydonlari qurib bitkaziladi.
Ayni paytda bunyodkorlik ishlari bilan birga hudud infratuzilmasini rivojlantirish maqsadida elektr energiyasi, ichimlik suvi, tabiiy gaz trubalarini tortish va boshqa shaharcha infratuzilmasini yaratish bo‘yicha keng ko‘lamli ishlar amalga oshirilmoqda.
— Avvaliga rejalashtirilgan sondagi hovlilarni qanday qilib quramiz, kimlarga beramiz deb rosa o‘ylandik, — deydi shahar hokimi Musaxon Mamadaliyev. – Ishonasizmi, dacha uchun yer ajratmasangiz, bo‘lmaydi, deyayotganlarning soni ortsa ortmoqda, kamaymayapti. Ulardan sababini so‘rasak, hududni havosi yoqayotganligini aytishmoqda.
Ma’lumotlarga ko‘ra, yaqin kunlarda Xontog‘ning yana 55–60 gektar qismida investitsiya dasturi doirasida yevropa andozalari asosida 1000 ta zamonaviy dachalarni bunyod etish ishlari boshlanadi. Ularni mas’uliyati cheklangan jamiyat shaklidagi “STS Andijon” O‘zbekiston–Ozarbayjon qo‘shma korxonasi binokorlari quradi.
— Andijonga aslida bir qator investitsion loyihalarni amalga oshirish uchun kelgandim, — deydi “STS Xolding Baku” loyihasi direktori Abbos Niyazov. – Kompaniyamiz hamkori bo‘lgan Oybek Abdug‘ofurov viloyatning diqqatga sazovor joylariga sayohat uyushtirishni taklif qildi va biz Xonobodga keldik. Bu yerdaga jozibadorlikni va turistik manzil ekanligini ko‘rib, turistlar uchun hamma qulayliklarga ega mehmonxonalar, yashash joylari va boshqa inshootlar qurish bo‘yicha yangi g‘oya paydo bo‘ldi. Viloyat rahbariga murojaat qilib, loyihamizni ko‘rsatganimizda, u qo‘llab-quvvatlashga tayyorligini bildirdi. Hozirda boshlang‘ich ishlar olib borilmoqda.
Izoh (0)