Шу кунларда Ўзбекистонга Хитойнинг CNTIC-CRRC DLOCO концорсиуми делегацияси ташриф буюрди. «Ўзбекистон темир йўллар» акциядорлик жамиятининг Марказий аппаратида Ўзбекистоннинг темир йўл маъмурияти бошқарувининг юк ва йўловчи ташиш учун локомотив ишлаб чиқарувчи ва етказиб берувчи компаниялар вакиллари билан учрашув бўлиб ўтди, бу ҳақда «Ўзбекистон темир йўллари» ахборот хизмати хабар қилади.
Учрашувда икки давлат ўртасидаги муносабатлар, хусусан, темир йўл соҳасидаги самарали ҳамкорлик изчил ривожланиб бораётганлигига алоҳида эътибор қаратилди. Шу ўринда, электровозларнинг 24 тасига (шу жумладан, 16 та юк ва 8 та йўловчи ҳамда юк ташишларга мўлжалланган) шартноманинг имзоланиши икки давлат алоқаларини кенгайтиришдаги ёрқин тасдиғи ва яна бир қадам ҳам десак муболаға бўлмайди.
Шартномани имзолашга бағишланган тантанали маросимида «Ўзбекистон темир йўллари» АЖ бошқаруви раиси Х.Хасилов, шунингдек, Хитой делегацияси раҳбарлари — CNTIC бошқаруви раиси Лин Чунхай ва CRRC Dalian Co. Ltd. бошқаруви раиси Лин Сунсен иштирок этди.
Янги локомотивлар «Темир йўл самарадорлигини ошириш» лойиҳаси доирасида, ҳамда, Ўзбекистон Республикаси Вазирлар Маҳкамасининг 2019 йил 15 июлдаги 586-сонли қароридан келиб чиқадиган «Локомотив паркини янгилаш» инвестиция лойиҳасида белгиланган чора-тадбирларни амалга ошириш доирасида сотиб олинади. Ушбу лойиҳа Осиё тараққиёт банкининг қарз маблағлари ҳисобидан амалга оширилади. Лойиҳани амалга ошириш муддати — 2019—2020 йиллар.
Қайд этилишича, Ўзбекистонда темир йўлларни электрлаштириш борасида юқори ўсиш суръатлари кузатилмоқда ва ушбу масаласига катта эътибор қаратилиши темир йўлларнинг ўтказувчанлик қобилиятини ошириш, поездлар ҳаракати хавфсизлигини таъминлаш, юк ва йўловчиларни белгиланган жойга етказиб бериш вақтини қисқартириш, эксплуатация харажатларини камайтириш, минтақадаги экологик вазиятни яхшилашга хизмат қилади.
Янги локомотивлар йўловчи ва юкларни ташишга мўлжалланган бўлиб, шу жумладан оғир юкларни тоғ шароитида ташиш имкониятига эга. Уларда қўлланилаётган замонавий технологиялар электр энергиясини тежаш билан бирга ёнилғи истеъмолни ҳам камайтиради. Экологик хавфсизлик бўйича халқаро талабларга жавоб берадиган мазкур локомотивлар асинхрон тортиш электр двигателлари билан жиҳозланган. Таъкидланишича, бугунги кунда «Ўзбекистон темир йўллари» АЖнинг локомотив паркида мавжуд локомотивларнинг 50 фоиздан ортиғи янгиланди.
Изоҳ (0)