29 март куни Самарқанд шаҳридаги 11-сонли болалар боғчасида тарбиячининг эътиборсизлиги сабаб 2013 йилда туғилган Санжар Ҳасановнинг ўнг қўлининг жимжилоғи узилиб тушган. Мазкур ҳолат юзасидан «Дарё» мухбири Фарҳод Норбўтаев журналистик суриштирув олиб борди. Журналистик суриштирув давомида дастлаб ҳолат юзасидан Санжар Ҳасановнинг бувиси Азиза Маъмурованинг фикрларини тингладик.
– Воқеа содир бўлгандан сўнг соат тахминан 14:00 атрофида менга боғчадан қўнғироқ қилиб онасини топа олмаяпмиз дейишди. Нима сабабдан қидираётганлигини сўраганимда неварангизни қўлини эшик қисди деб айтишди, — дейди Азиза Маъмурова. – Шундан сўнг вилоят кўп тармоқли шифохонасида эканлигини айтди. Шифохонага борсам боғча мудираси, икки нафар ишчиси ва шифокор бор экан. Қарасам неварамнинг қўли қон. Шифокор ўзингизни боссангиз бир гап айтаман деди. Хўп деганимдан сўнг шифокор неварангизни бармоғи узилган деб айтди.
Азиза Маъмурованинг таъкидлашича, вилоят кўп тармоқли шифохонасининг хирург шифокори Республика шошилинч тез тиббий ёрдам илмий маркази Самарқанд филиалига олиб боришини айтган. Ўша куни кучли ёмғир ёғиб йўлларни сув босганлиги боис кўчаларда тирбандлик юзага келган. Шу сабабли икки соат деганда шифохонага етиб боришган.
Маълум бўлишича, боғча масъуллари боланинг бармоғини целлофан пакетга солиб боришган. Республика шошилинч тез тиббий ёрдам илмий маркази Самарқанд филиали шифокори боланинг бармоғи узилганига анча бўлганлигини айтиб, ҳеч бўлмаганда бармоқни сувга солиб келганда ҳам уни улаш имкони бўлишини таъкидлаган.
– Боғчага борсак, воқеа содир бўлган жойнинг қонларини тозалаб қўйишган экан. Ҳеч ким билмайди қандай бўлганлигини. Экспертиза ҳам қилмади. Экспертизани ўзимиз қилдик. Аммо натижасини билмаймиз. Ишни ўрганган прокурор қаерга ёзсангиз ҳам хатингиз менга келади деб айтди, — дейди Азиза Маъмурова.
Ўрганишлар давомида маълум бўлишича, Санжар Ҳасанов бармоғи узилгандан сўнг 3 кун ҳеч ким билан гаплашмаган. Азиза Маъмурова невараси билан гаплашганда, бола воқеа қандай бўлганини айтиб берган. Санжар қўлини қисиб қолган вақтда тарбиячисини чақирган. Аввалига у келмаган. Сўнг келиб қўли қисилиб турган Санжарни ортидан келиб тортиб олган. Ўша вақтда бармоғи узилиб тушган.
– Шундан сўнг тарбиячиси неварамни қўрқитиб уни ухлатган. Ким биландир маслаҳатлашиб ишни ёпиб юборди. Прокуратура эса воқеани бахтсиз ҳодиса деб баҳолади. Улар болага биринчи ёрдамни кўрсатишни эмас, балки ўзларининг тинчини ўйлаган, — дейди Азиза Маъмурова. – Биласизми, прокуратурада қаердандир қизимнинг номидан ёзилган тушунтириш хати пайдо бўлиб қолган. Ваҳоланки, ўша вақтда қизим боласининг аҳволини кўриб додлаб ётган эди. Воқеадан сўнг стресс ҳолатга тушиб қолган қизим тушунтириш хатини қандай қилиб ёзиб беради?
Маълум бўлишича, воқеа 29 март куни бўлган. Бироқ боланинг бармоғини орадан беш кун ўтганидан сўнг, Санжар Ҳасановнинг яқинларининг қистови билан экспертизадан ўтказилган.
Ҳолат юзасидан 11-мактабгача таълим ташкилотининг мудираси Додарой Аҳмедова, ўша куни тарбиячи бўлиб ишлаган Лобар Эрданова ва хўжалик мудираси билан суҳбатлашдик. Суҳбат давомида маълум бўлишича, 29 март куни соат тахминан 12:00 атрофида Санжар Ҳасанов ўртоғи билан икки кишига мўлжалланган каравот устидан ўйинчоғини олаётганда каравот Санжарнинг ўнг қўл кичик бармоғини қисиб қолган. Қизиқ жиҳати шундаки, воқеа содир бўлган куни тарбиячи айнан ўша хонада бўлган. Буни суҳбат жараёнида Лобар Эрданованинг ўзи айтиб ўтди.
– Биз ҳолат қандай бўлганлигини кўрмадик. Санжар ўртоғи билан каравотга ўйнаб чиққан. Чиқиш вақтида каравот бармоғини қисиб қолган. У каравотнинг зинасидан чиққанида мени чақиради. У осилиб қолганидан сўнг ўзининг вазни билан пастга тушган. Бўйи етмаганлиги сабабли оғирлиги эвазига бармоғи узилган, — дейди ҳамшира-тарбиячи Лобар Эрданова.
Муассаса мудираси Додарой Аҳмедованинг айтишича, ҳодиса содир бўлгандан сўнг биринчи ёрдам кўрсатилгандан дастлаб сўнг шаҳар кўп тармоқли шифохонасига, ундан сўнг вилоят болалар кўп тармоқли шифохонасига, у ердан сўнг вилоят кўп тармоқли шифохонасига олиб борган. Санжар Ҳасановнинг бувиси Азиза Маъмурова келганидан сўнг Республика шошилинч тез тиббий ёрдам илмий маркази Самарқанд филиалига олиб борган. Икки соатдан кўп вақт давомида жабрланувчи 4 та шифохонага олиб борилган.
– Тез ёрдамдан кўра ўзим тезроқ бораман деб болани шаҳар касалхонасига олиб бордим. У ерда болани қўлини очиб кўрди ва буни 14–15 ёшга кирганда Тошкентда пластик операция йўли билан қўлини улаш мумкин деди. Шунда ҳам умидсизликка тушмасдан дарров болани вилоят касалхонасига олиб келдим, — дейди муассаса мудираси Додарой Аҳмедова. – Ўша вақтда ота-онасини кутиб ўтиришга вақт йўқ эди. Ҳар дақиқани ғанимат деб билдик. Мақсадимиз яхши шифокорга кўрсатиш эди.
Олиб борилган журналистик суриштирув давомида ўша куни гуруҳда 40 нафар бола бўлганлиги аниқланди. Бу эса белгиланган норма ҳужжатларига зид. Қолаверса, боғча тарбиячиларидан бири туғруқ таътилига чиққан бўлса, яна бири рухсат олганлиги боис кўнгилсизлик юз берган куни боғча ҳамшираси Лобар Эрданова тарбиячи вазифасини бажарган.
– Ички ишлар бўлимидан келиб бўлган ҳодисани кўрди. Экспертиза қилди. Ҳар биримиздан тушунтириш хати олди. Тарбиячилардан тушунтириш хати олди. Ўша воқеа куни соат 23:00 гача суриштирув олиб борди. Бу ерда тарбиячининг масъулиятсизлиги бўлганлиги сабабли унинг айби бор деб ўйлайман. Тарбиячи барибир ҳар бир болага масъулият билан қараши керак. Чунки ҳар бир болага биз жавобгармиз, — дейди Додарой Аҳмедова.
Ҳолат юзасидан Самарқанд шаҳар прокуратураси томонидан терговолди суриштирув ҳаракатлари олиб борилган. Аниқланган ҳолат юзасидан мактабгача таълим муассасаси хўжалик ишлари бўйича мудирига нисбатан маъмурий баённома тузилиб, энг кам ойлик иш ҳақининг уч баробари миқдорида жарима жазоси тайинланган. Муассаса тарбиячисига эса ҳайфсан интизомий жазоси белгиланган.
Мазкур журналистик суриштирувни тайёрлаш давомида Санжар Ҳасановнинг тоғаси билан бўлиб ўтган суҳбат аудиоси келиб тушди. Аудиоёзувда Санжар Ҳасанов тарбиячиси қўлини қисганлиги, кечирим сўраса ҳам барибир қисаверганлиги, қўлини аста олаётганда тарбиячи тортиб олганлигини билдирган. Шунингдек, тарбиячиси уриб-уриб ухлатганлигини айтиб, «Бобонгга, дадангга, аянгга, тоғангга, ҳеч кимга айтма, айтсанг яна ураман», деб айтганлигини билдириб ўтган.
– Биринчи ёрдамни қилганида умуман ҳеч қаерга мурожаат қилмасдим. Улар ҳеч кимга айтмай ишни яширмоқчи бўлганлиги бизнинг жаҳлимизни чиқарди. Неварам ҳар куни онасидан бармоғим ўсиб чиқадими деб сўрайди. Нима деб айтишимизни билмаймиз, — дейди Азиза Маъмурова.
Изоҳ (0)