Бухоро давлат университетига кириш имтиҳонларига ҳужжат топшириш учун энг сўнгги абитуриент 15 июль куни соат 23:58 да рўйхатдан ўтди. Бу ҳақда Бухоро вилояти ҳокимлиги матбуот хизмати хабар берди.
Энг сўнгги абитуриент — Гулбаҳор Шавкатовна Атоева бўлган. У 1983 йил Ғиждувонда туғилган. 14 июль куни тунда ўғил фарзанд дунёга келтирган аёл ҳужжат топшириш учун туғуруқхонадан чиқиб келган. Бухоро Давлат университети, Навоий Давлат педагогика институти ҳамда учинчи танлов Самарқанд Давлат университетининг Бошланғич таълим ва спорт-тарбиявий иш йўналишларига ҳужжат топширган ва яна туғруқхонага қайтиб кетган.
— Бухоро давлат университетига энг сўнгги ҳужжатнинг ёш она томонидан топширилиши, негадир, ҳаммамизга қувонч ва кўтаринки кайфият бағишлади. Кун давомидаги чарчоқлар чиқиб кетди. Энг сўнгги абитуриент – ёш онани ҳам оналик бахти, ҳам ҳужжат топширишга улгуриб қолгани билан табриклаб, қарсаклар билан кузатдик, — деди Давлат тест маркази Бухоро бўлими ходими Иззат Раҳмонов.
Изоҳ (0)