2020 йилнинг охирига қадар Ўзбекистондаги барча истеъмолчилар, шунингдек, тадбиркор ва хусусий бизнес эгалари «ақлли» электр ҳисоблагичлар билан таъминланади, деб хабар берди «Подробно».
Айни вақтда бутун мамлакат бўйлаб 950 мингдан ортиқ шу турдаги қурилмалар ишламоқда, кейинги йилнинг охирига қадар эса яна 7 миллиондан ортиқ ҳисоблагич ўрнатилади. Замонавий ҳисоблагичларнинг аксарияти «Электрон ҳисоблагич» ва «Тошелектроаппарат» маҳаллий ишлаб чиқарувчилари томонидан етказиб берилмоқда. Ушбу қурилмалар ўзидан олдинги ҳисоблагичлардан фарқли ўлароқ 20 дан ортиқ функцияни бажара олади.
Ҳисоблагич ўрнатилиши билан автоматлаштирилган назорат тизими ва электр энергияси ҳисобига уланади. Дастурнинг ўзига хос жиҳатларидан бири — истеъмолчини SMS-хабарнома орқали автоматик равишда пул тушириш ҳақида огоҳлантиралади.
Бунинг учун истеъмолчи ўзининг мобил рақамини «Электрҳисоблагич» дастурига улаши лозим, бу эса ўз навбатида тўловларни уйдан чиқмасдан туриб онлайн режимида амалга ошириш имконини беради. Таъкидлаш керакки, ҳар бир истеъмолчи ўзининг «шахсий кабинети» орқали истеъмол қилинган электр энергияси ҳақида батафсил маълумотга эга бўлиши мумкин.
Янги тизимда ҳисоблагич кўрсаткичлари компьютер томонидан назорат қилинади. Шу сабабли электр таъминоти билан шуғулланувчи ташкилотларнинг ходимлари уйма-уй юрмасдан туриб ҳисоблагичларни назорат қила олади.
Бундан ташқари «ақлли» электр ҳисоблагич истеъмол қилинган электр энергиясини ҳисоблашда, маълумотларни йиғиш ва қайта ишлашда, ишончлиликни таъминлаш ва тезкорлик билан ишлашда инсон омилининг таъсирини камайтиради.
Шунингдек, ушбу ҳисоблагичларга истеъмолчи томонидан бирор-бир ташқи таъсир ўтказишга уринилганида у автоматик равишда ўчади ва бу ҳақда тизимга хабар беради. Ўз вақтида пул тўланмаса ҳам электр энергиясини узатиш автоматик режимда тўхтатилади.
Янги ҳисоблагичлар ҳар 10 йилда давлат назоратидан ўтказилади. Ҳар бири 770 минг турадиган электр ҳисоблагич қурилмалар истеъмолчиларга бепул ўрнатиб берилади.
Изоҳ (0)