Самарқанд вилоят халқ таълими бошқармаси ижтимоий тармоқларда тиббий ниқоб кийган ўспирин йигит бекатда трамвайга югуриб кириб, йўловчиларнинг юзига номаълум суюқликни сепиб, қочиб кетган ҳолатга ўз муносабатини билдирди.
Самарқанд вилоят халқ таълими бошқарма матбуот котиби Дилором Абдураҳмонованинг «Дарё»га маълум қилишича, воқеани содир этган ўқувчилар ва уларнинг ота-оналари билан суҳбат уюштирилиб тушунтириш ишлари олиб борилган.
– Шаҳардаги 33, 42 ва 43-умумтаълим мактабларининг маънавий-маърифий ишлар бўйича директор ўринбосарларига ўқувчиларга ижтимоий тармоқлардан тўғри фойдаланиш борасида тушунтириш ишларини олиб бориш вазифаси юклатилди, — дейди Дилором Абдураҳмонова. – Айни пайтда ўқувчилар мактаб қошида, «Соғломлаштириш майдончалари»да ташкил этилган тўгаракларга бириктирилди. Уларга мактаб амалиётчи-психологлари ва тажрибали педагог-ходимлар масъул этиб тайинланди.
Самарқанд шаҳри бўйича Ички ишлар органлари фаолиятини мувофиқлаштириш бошқармаси томонидан олинган маълумотларга кўра, ижтимоий тармоқларда пранк қилган ўқувчиларнинг ота-оналарига нисбатан Маъмурий жавобгарлик тўғрисидаги Кодекснинг 47-моддаси (Болаларни тарбиялаш ва уларга таълим бериш борасидаги мажбуриятларни бажармаслик) билан иш очилган. Ушбу модда бўйича айбдор деб топилган шахслар энг кам иш ҳақининг иккидан бир қисмидан уч бараваригача миқдорда жаримага тортилиши мумкин.
– Ўқувчиларнинг таътилга чиққанига 1 ойдан ошди. Ўтган ўқув йили давомида мактаб ўқувчилари томонидан бундай нохуш ҳолатлар қайд этилмаган. Бироқ, бола ота-она назоратига ўтганидан сўнг кечагидек ҳолат юзага келди, — дейди 33-умумтаълим мактаби директор ўринбосари Карим Ёқубов. – Бола тарбияси учун ота-она масъул ҳисобланади. Мактабдан ташқарида, айниқса таътил давомида ўқувчилар билан юз бераётган нохуш воқеалар учун ота-оналар ўз жавобгарлигини ҳис қилиш вақти келган.
Изоҳ (0)