Мактабгача таълим вазирлиги ва ЛУKОЙЛ 5 июль куни Ўзбекистонда бир қатор янги мактабгача таълим ташкилотларини қуриш тўғрисида битим имзолади. Бу ҳақда «Дарё»га вазирлик матбуот хизмати хабар берди.
Ҳужжатда Бухоро, Қашқадарё ва Тошкент вилоятларида бир қатор янги мактабгача таълим ташкилоти (МТТ)ни қуриш кўзда тутилган.
Битимни имзолаш маросими 6 июль куни Нукусдаги имконияти чекланган болалар учун «Имкон» реабилитация марказига эга биринчи ихтисослашган МТТда бўлиб ўтди. Янги мактабгача таълим ташкилотлари Бухоро шаҳрида (250 ўрин), Қарши шаҳрида (150 ўрин) ва Тошкент вилоятида (150 ўрин) қурилади.
«ЛУKОЙЛ компанияси шарофати билан вилоятлардаги яна 550 нафар бола сифатли мактабгача таълим олиш имконига эга бўлади. Бухородаги МТТ умумий турдаги ташкилот, бошқа иккита МТТ эса — реабилитация марказларига эга бўлган кўп тармоқли ихтисослашган ташкилотлар бўлади. Бу реабилитация марказлари тарбияланувчилардан ташқари ҳар йили соғломлаштириш муолажаларига муҳтож бўлган 5—7 минг болани қабул қилади», — дейди Мактабгача таълим вазири Агриппина Шин.
Қарши шаҳри ва Тошкент вилоятидаги лойиҳалар учун Нукусдаги «Имкон» реабилитация марказига эга ИМТТ прототип бўлиб хизмат қилади. Лойиҳада жисмоний ва ақлий ривожланиши ўзига хос болалар учун мактабгача таълим ва тиббиёт муассасалари бирлаштирилган. Янги МТТда замонавий даволаш-физкултура ва физиотерапия заллари, уқалаш хоналари, сенсор хоналари, майда моторикани ривожлантириш, ижтимоий-маиший адаптация, мусиқа ва арт-терапия хоналари, шунингдек врачларнинг кабинетлари жойлашади.
«Ўзбекистонда ‘Имкон’ реабилитация марказига эга биринчи ихтисослашган МТТнинг очилиш маросимида биз бундай мактабгача таълим ташкилотлари республиканинг бошқа ҳудудларида ҳам ташкил этилишини ваъда қилган эдик. Бугун биз ЛУKОЙЛ билан битим имзоладик, у Қашқадарё ва Тошкент вилоятларининг алоҳида эҳтиёжлари бўлган болаларига эрта ёрдам кўрсатиш ва уларни ижтимоий-маданий муҳитга киритиш имконини беради. Уйда ўтириб қолмасдан, доим мулоқотда бўлиш, дунёни билиш, ривожланиш ва мослашиш имконияти–бу тўлақонли ҳаёт сари қўйилган биринчи қадам демакдир. Бунда бола саломатлигида чекланиш бўлсада, унинг имкониятлари чекланганмаган бўлиши даркор», — деди лойиҳа раҳбари Шаҳноза Мирзиёева.
Изоҳ (0)