Samarqand viloyat xalq ta’limi boshqarmasi ijtimoiy tarmoqlarda tibbiy niqob kiygan o‘spirin yigit bekatda tramvayga yugurib kirib, yo‘lovchilarning yuziga noma’lum suyuqlikni sepib, qochib ketgan holatga o‘z munosabatini bildirdi.
Samarqand viloyat xalq ta’limi boshqarma matbuot kotibi Dilorom Abdurahmonovaning “Daryo”ga ma’lum qilishicha, voqeani sodir etgan o‘quvchilar va ularning ota-onalari bilan suhbat uyushtirilib tushuntirish ishlari olib borilgan.
– Shahardagi 33, 42 va 43-umumta’lim maktablarining ma’naviy-ma’rifiy ishlar bo‘yicha direktor o‘rinbosarlariga o‘quvchilarga ijtimoiy tarmoqlardan to‘g‘ri foydalanish borasida tushuntirish ishlarini olib borish vazifasi yuklatildi, — deydi Dilorom Abdurahmonova. – Ayni paytda o‘quvchilar maktab qoshida, “Sog‘lomlashtirish maydonchalari”da tashkil etilgan to‘garaklarga biriktirildi. Ularga maktab amaliyotchi-psixologlari va tajribali pedagog-xodimlar mas’ul etib tayinlandi.
Samarqand shahri bo‘yicha Ichki ishlar organlari faoliyatini muvofiqlashtirish boshqarmasi tomonidan olingan ma’lumotlarga ko‘ra, ijtimoiy tarmoqlarda prank qilgan o‘quvchilarning ota-onalariga nisbatan Ma’muriy javobgarlik to‘g‘risidagi Kodeksning 47-moddasi (Bolalarni tarbiyalash va ularga ta’lim berish borasidagi majburiyatlarni bajarmaslik) bilan ish ochilgan. Ushbu modda bo‘yicha aybdor deb topilgan shaxslar eng kam ish haqining ikkidan bir qismidan uch baravarigacha miqdorda jarimaga tortilishi mumkin.
– O‘quvchilarning ta’tilga chiqqaniga 1 oydan oshdi. O‘tgan o‘quv yili davomida maktab o‘quvchilari tomonidan bunday noxush holatlar qayd etilmagan. Biroq, bola ota-ona nazoratiga o‘tganidan so‘ng kechagidek holat yuzaga keldi, — deydi 33-umumta’lim maktabi direktor o‘rinbosari Karim Yoqubov. – Bola tarbiyasi uchun ota-ona mas’ul hisoblanadi. Maktabdan tashqarida, ayniqsa ta’til davomida o‘quvchilar bilan yuz berayotgan noxush voqealar uchun ota-onalar o‘z javobgarligini his qilish vaqti kelgan.
Izoh (0)