9-10 июль кунлари Самарқанд шаҳрида Мустақил Давлатлар Ҳамдўстлиги (МДҲ) Туризм кенгашининг йиғилиши ўтказилиши ҳақида хабар берилган эди.
5 июль куни Тошкентдаги «Пойтахт» халқаро бизнес марказида ушбу тадбир ҳамда Президент Шавкат Мирзиёев ташаббуси билан ўтаётган МДҲ мамлакатлари I туристик ярмаркасига бағишланган матбуот анжумани ташкил этилди.
Унда Туризмни ривожлантириш давлат қўмитаси раиси в.в.б. Абдулазиз Аққулов, Халқаро алоқалар ва протокол бошқармаси бошлиғи Нодира Бердимуратова ҳамда унинг ўринбосари Феруз Додиев, Илмий тадқиқотлар ва таълим муассасалари билан ишлаш бошқармаси бошлиғи Анвар Аллабергеновлар иштирок этди.
Тадбир доирасида соҳа вакиллари Самарқандда ўтадиган МДҲ Туризм кенгаши йиғилиши ва Биринчи туристик ярмаркасига доир маълумотлар билан бўлишди, шундан сўнг оммавий ахборот воситалари вакиллари ўзларини қизиқтирган саволларга берди.
Туризмни ривожлантириш давлат қўмитаси раиси в.в.б. Абдулазиз Аққуловнинг сўзларига кўра икки кунлик тадбир амалий натижаларга бой бўлади. Тадбир доирасида шунингдек «МДҲ давлатларида туризм ва минтақавий ҳамкорлик: янги чақирувлар ва имкониятлар» мавзусида халқаро илмий-амалий семинар ҳам ўтказилиб, унда илмий доира вакиллари иштирок этади ҳамда туризмдаги минтақавий ҳамкорлик масалалари муҳокама қилинади ва соҳа ривожи йўлидаги муаммолар ўрганилиб, уларга ечимлар изланади.
«Ушбу семинар доирасида, шунингдек, ‘Ипак йўли’ халқаро туризм университети билан ҳамкор олий таълим муассасалари тегишли тақдимотлари билан қатнашишлари кутилмоқда», - дейди Туризмни ривожлантириш давлат қўмитаси раиси в.в.б.Абдулазиз Аққулов.
МДҲ мамлакатлари туристик жозибадорлигини ошириш ва соҳа вакилларининг фаол иштирокини таъминлаш мақсадида, Ўзбекистон Республикаси Туризмни ривожлантириш давлат қўмитаси томонидан 2018 йилнинг 10-11 августида Душанбе (Тожикистон) шаҳрида бўлиб ўтган МДҲ мамлакатлари Туризм кенгаши йиғилиши доирасида навбатдаги тадбирни Самарқанд шаҳрида ўтказиш таклиф қилинган эди.
Шунингдек, Ўзбекистон Президенти ташаббуси ҳамда Вазирлар Маҳкамасининг МДҲ мамлакатлари Туризм кенгаши йиғилишини Самарқандда ўтказишга доир топшириғига мувофиқ, Туризмни ривожлантириш давлат қўмитаси томонидан МДҲ мамлакатлари Биринчи туризм ярмаркасини ўтказиш бўйича лойиҳа ишлаб чиқилди.
Лойиҳага кўра, мазкур ярмарканинг МДҲ мамлакатлари Туризм кенгаши тадбири доирасида ташкил этилишига келишилди. Мазкур формат МДҲга аъзо мамлакатларнинг туристик салоҳияти билан яқиндан танишиш, Ҳамдўстликдаги туризм секторинг муҳим трендлари ва янгиликларини алмашиш, туризм ташкилотлари ва бизнес вакиллари ўртасидаги тўғридан-тўғри мулоқотни кучайтириш учун қулай шароит яратади.
Тадбирнинг асосий мақсади МДҲ мамлакатлари ўртасида қўшма туризм лойиҳаларни сонини орттириш, «ҳамкорлик ва аҳил қўшничилик» руҳини қўллаб-қувватлашдан иборат. МДҲ Туризм кенгаши йиғилиши ва I туристик ярмаркаси ташкилотчилари – Ўзбекистон Республикаси Туризмни ривожлантириш давлат қўмитаси, МДҲ Ижро қўмитаси, Ташқи ишлар вазирлиги ва Самарқанд вилояти ҳокимлиги.
Изоҳ (0)