Жиззах вилоятида жойлашган «Фориш» полигонида Мудофаа вазирлиги қўшинларида «Жанговар машиналар биатлони – 2019» мусобақасининг финал босқичи ўтказилмоқда. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
«Халқаро армия ўйинлари майдони»да ўтказилаётган мусобақанинг дастлабки кунида БТР-70 жанговар машиналари экипажлари биринчилик сари ўзаро кураш олиб борди.
«Шимолий-ғарбий, Тошкент ва Шарқий ҳарбий округларнинг БТР-70 экипаж жамоалари ўз маҳоратларини намойиш этди. Ҳар бир жамоа мусобақага жиддий тайёргарлик кўрган. Бу уларнинг бири-биридан мураккаб тўсиқларни забт этишидан яққол намоён бўлмоқда. Ҳар бир тўсиқ замонавий камералар билан жиҳозлангани ҳакамлар ҳайъати учун мусобақани онлайн тарзда кузатиб бориш, мусобақани холисона баҳолаш имконини бермоқда», — дейилади хабарда.
БТР-70 жанговар машиналар беллашувида Марказий ҳарбий округ биринчи ўринни қўлга киритди. Иккинчи ўрин Тошкент ҳарбий округи жамоасига насиб этган бўлса, Қуролли Кучлар академияси 3-ўринга лойиқ деб топилди.
Мусбоқанинг иккинчи кунида БМП жанговар машиналари ўзаро кураш олиб борди. Якка тартибда ҳаракатланган техникалар ҳар бир шартни муваффаққиятли бажаришга, ҳар бир дақиқиқадан унумли фойдаланишга ҳаракат қилди. Ушбу йўналишда Қуролли Кучлар академияси жамоаси 1-ўринни, Жануби-ғарбий махсус ҳарбий оуруг жамоаси эса учинчи ўринни эгаллади. Эртага эса БМД экипажлари ўз маҳоратларини намойиш этади.
Мудофаа вазирлиги миқиёсида ўтказилаётган мазкур мусобақа 7 июлга қадар давом этади. Ғолиб ва совриндорларга Мудофаа вазирлиги томонидан қимматбаҳо совғалар, малака тоифани бир поғона кўтариш, мамлакатимизда ишлаб чиқарилган енгил автомобиллар сотиб олишга имтиёзли кредитлар ажратиш белгиланган.
Изоҳ (0)