Тошкент шаҳар Экология ва атроф муҳитни муҳофаза қилиш бошқармасига 4 июль куни Юнусободдаги дарахтлар ноқонуний кесилаётганлиги ҳақида тезкор хабар келиб тушган.
Шаҳар ҳокимлиги матбуот хизмати берган ахборотга кўра, дарахтлар кесилаётгани ҳақидаги хабар бу каби вазиятлар учун махсус ишлаб чиқилган @EcoControl_bot Telegram-боти орқали юборилган.
Тезкор суриштириш ишлари натижасида ҳақиқатан ҳам Юнусобод-4 мавзеси «Биллур» маҳалласида диаметри 51 сантиметрдан 78 сантиметргача бўлган 11 та дарахт ноқонуний кесилганлиги аниқланган.
Дарахтлар «Метин коммунал сервис» компанияси томонидан кесилган. «Табиатга етказилган зарар жами 163 663 929 сўм деб баҳоланди», — дейилади ҳокимлик ахборотида.
Ушбу ҳолат бўйича туман Экология инспекцияси томонидан расмийлаштирилган барча ҳужжатлар прокуратура органларига тақдим этиш учун тайёрланмоқда.
Шаҳар ҳокимлиги дарахтларнинг ноқонуний кесилишига гувоҳ бўлган фуқароларни @EcoControl_bot Telegram-боти мурожаат қилишга чорлаган.
Изоҳ (0)