Ўтган ҳафта Қорақалпоғистонда кучли шамол зарар етказган 34 та уй томининг 20 таси профнастилдан тайёрланган, дея хабар берди Қорақалпоғистон Турар жой коммунал хизмат кўрсатиш вазирлиги. «Газета.uz»нинг ёзишича, қолган 14 та уйнинг томи эса асбест цементли шиферлар билан ёпилган.
Кучли шамол 10 та уйнинг томи тўлиқ учириб юборган, уларнинг 8 таси — профнастилдан, 2 таси эса шифердан. Қолган уйларнинг томлари 10—80 фоиз шикастланган.
Зарар кўрган уйларнинг катта қисми — 8 та уйда 2018 йилда қурилиш-таъмирлаш ишлари олиб борилган (2013 йилда — 5 та уй, 2017 йилда — 4, 2014, 2015 ва 2019 йилларда — 3 тадан, 2016 йилда — 2).
Қурилиш ва таъмирлаш ишларини «Таъмирлаш-тиклаш хизматлари» ДУК (2 та уй), Azat Invest Story (2), Jayxun Universal Qurulis (2), Qutlimurat Qurilis (2), Nukus Temir Beton (1), Azizbek Nukus (1), Sabina Sayora Kommunal Servis (1), Nukus Guldarxal (1), Qaraqalpaq Awil Jay Qurilis Onlaw (1), Kegeyli Qurilis Montaj (3) ва Prima Nukus (1) компаниялари олиб борган.
Нукусда ва Қорақалпоғистоннинг бошқа туманларида 14 июнь куни 20:32 дан 20:38 гача кучли шамол қайд этилиб, унинг тезлиги 18—23 м/с гача борди. Нукусда шамол 27 та, Хўжайли туманида — 2 та, Шуманайда — 4 та ва Ташиатош туманида — 1 та уйнинг томига шикаст етказди.
Асосан янги қурилган уйларнинг томлари бинодан қўпорилиб, одамлар ҳаётига хавф туғдирган ҳолда пастга қулаган. Ўтиб кетаётган ва қўйиб кетилган автомобиллар, кўп йиллик дарахтларга зарар етказган. Қайд этилишича, Бош прокуратура ва Қорақалпоғистон прокуратураси вазиятни ўрганмоқда.
Изоҳ (0)