O‘tgan hafta Qoraqalpog‘istonda kuchli shamol zarar yetkazgan 34 ta uy tomining 20 tasi profnastildan tayyorlangan, deya xabar berdi Qoraqalpog‘iston Turar joy kommunal xizmat ko‘rsatish vazirligi. “Gazeta.uz”ning yozishicha, qolgan 14 ta uyning tomi esa asbest sementli shiferlar bilan yopilgan.
Kuchli shamol 10 ta uyning tomi to‘liq uchirib yuborgan, ularning 8 tasi — profnastildan, 2 tasi esa shiferdan. Qolgan uylarning tomlari 10—80 foiz shikastlangan.
Zarar ko‘rgan uylarning katta qismi — 8 ta uyda 2018-yilda qurilish-ta’mirlash ishlari olib borilgan (2013-yilda — 5 ta uy, 2017-yilda — 4, 2014, 2015 va 2019-yillarda — 3 tadan, 2016-yilda — 2).
Qurilish va ta’mirlash ishlarini “Ta’mirlash-tiklash xizmatlari” DUK (2 ta uy), Azat Invest Story (2), Jayxun Universal Qurulis (2), Qutlimurat Qurilis (2), Nukus Temir Beton (1), Azizbek Nukus (1), Sabina Sayora Kommunal Servis (1), Nukus Guldarxal (1), Qaraqalpaq Awil Jay Qurilis Onlaw (1), Kegeyli Qurilis Montaj (3) va Prima Nukus (1) kompaniyalari olib borgan.
Nukusda va Qoraqalpog‘istonning boshqa tumanlarida 14-iyun kuni 20:32 dan 20:38 gacha kuchli shamol qayd etilib, uning tezligi 18—23 m/s gacha bordi. Nukusda shamol 27 ta, Xo‘jayli tumanida — 2 ta, Shumanayda — 4 ta va Tashiatosh tumanida — 1 ta uyning tomiga shikast yetkazdi.
Asosan yangi qurilgan uylarning tomlari binodan qo‘porilib, odamlar hayotiga xavf tug‘dirgan holda pastga qulagan. O‘tib ketayotgan va qo‘yib ketilgan avtomobillar, ko‘p yillik daraxtlarga zarar yetkazgan. Qayd etilishicha, Bosh prokuratura va Qoraqalpog‘iston prokuraturasi vaziyatni o‘rganmoqda.
Izoh (0)