7 июнь куни вилоят тарихидаги энг йирик халқаро иқтисодий тадбир — Наманган халқаро инвестицион форуми ўз ишини бошлайди. Бу ҳақда «Дарё» мухбири Азизбек Абдувалиев хабар бермоқда.
Наманган вилояти ҳокимлиги, Инвестициялар ва ташқи савдо вазирлиги, Ташқи ишлар вазирлиги, Туризмни ривожлантириш қўмитаси ҳамда Ўзбекистоннинг хориждаги элчихоналари ҳамкорлигида ўтказилаётган форумда вилоятнинг инвестицион салоҳияти намоён этилади ҳамда ишлаб чиқарувчиларининг миллий кўргазмаси ташкил этилади.
«Doing Business with Namangan — 2019» инвестицион форумида Россия, Туркия, Хитой, Корея, Япония, Эрон, Германия, Буюк Британия, Франция, Италия, Голландия, Бельгия, Австрия, Ҳиндистон, Покистон, Бангладеш, Миср, Кувайт, Исроил, Сингапур, Уммон, БАА, Таиланд, Малайзия, Озарбайжон, Қозоғистон, Польша, Латвия, Люксембург, Тожикистон, Беларусь, Болгария, Грузия, Индонезия ва Украинадан 228 та хорижий компания вакиллари қатнашади. Шунингдек, форумда Ўзбекистоннинг 29 хорижий мамлакатдаги элчилари, 32 давлатнинг Ўзбекистондаги дипломатик миссиялари вакиллари ҳамда 10 дан ортиқ хорижий ОАВ мухбирлари иштирок этади.
Форумнинг тантанали очилиш маросими Наманган шаҳридаги «Шодиёна» мажмуасида бўлиб ўтади. Шундан сўнг Давлат хизматлар марказида 4 та йўналиш — саноат ва муқобил энергия манбалари, қишлоқ хўжалиги ва маҳсулотларни қайта ишлаш, маданий-тарихий туризм, инновацион ғоялар ва технологиялар ҳамда хорижий таълим муассасалари билан ҳамкорликни кенгайтириш мавзуларида сексиялар муҳокамаси ўтказилади.
«Паҳлавон» спорт мажмуасида Наманган вилояти ишлаб чиқарувчиларининг миллий кўргазмаси, янги инвестиция лойиҳалари тақдимоти, «B2G» ва «B2B» форматдаги кооперацион биржалари ҳамда пресс-брифинг бўлиб ўтади.
Шунингдек, меҳмонлар вилоятдаги бир қатор корхоналарда бўлиши, тарихий обидаларни зиёрат этиши кўзда тутилган.
Наманганга келаётган меҳмонлар учун вилоят ҳокимлиги томонидан махсус чартер рейси ташкил қилинди.
Изоҳ (0)