Opensignal сервиси 4G интернети рейтингида Ўзбекистонни охирги ўринга киритди

Opensignal хизмати дунёдаги турли мамлакатлардаги мобил интернет тармоғи ҳолати тўғрисида янги ҳисоботни эълон қилди. Бу ҳақда Spot хабар берди.

Жанубий Корея ўртача тезлик даражаси бўйича биринчи ўринни олди — 52,4 Мбит / с. Иккинчи ўринни Норвегия (48,2 Мбит/с), учинчи ўринни Канада (42,5 Мбит/с) эгаллади. Энг охирги ўринларни Ўзбекистон (5 Мбит/с), Непал (4,4 Мбит/с), Жазоир (3,1 Мбит/с) ва Ироқ (1,6 Мбит/с) эгаллаган.

Жанубий Корея 4G интернетга уланиш бўйича ҳам биринчи ўринни олди. Мамлакатдаги ўрта ҳисобдаги абонентлар 97,5 фоиз ҳолларда 4G’га улана олади. Иккинчи ўринни Япония (96,3%), учинчи ўринни эса Норвегия (96,3%) эгаллади.

Интернет тезлиги бўйича рейтингда Ўзбекистон кўрсаткичлари тўртта мамлакатдан яхшироқ бўлган бўлса, бу рейтингда у охирги ўринни эгаллади. Opensignal маълумотига кўра, Ўзбекистондаги ўрта ҳисобдаги абонентлар 49,9 фоиз ҳолатларда 4G инернетга улана олади.

Ҳисобот тузувчилар Ўзбекистон 4G’га уланиш даражаси 50 фоиздан тушиб кетган рўйхатдаги ягона давлат эканлига эътибор қаратган. Охиридан битта аввал ўринни эгаллаган Жазоирда бу кўрсаткич 56,5 фоизга, Эквадорда — 57,1 фоиз, Непалда — 57,6 фоиз, Ироқда 59,7 фоизга тенг.

2018 йилнинг ноябрь ойида Ўзбекистонда 4G кириб келиш даражаси 8,7 фоизни ташкил этиши маълум бўлган эди. Аҳолининг асосий қисми 2G (33,9 фоиз) ва 3G (31,4 фоиз)дан фойдаланади.