Бухоро вилояти Шофиркон туманида ўтказилган сайёр қабул давомида Ўзбекистон Давлат солиқ қўмита раиси ўринбосари бошчилигидаги ишчи гуруҳи йиллар давомида ундирилмай келаётган солиқ қарздорликларини тугатиш чораларини кўришга ҳам эътибор қаратди, деб хабар беради Давлат солиқ қўмитаси матбуот хизмати.
Жумладан, Шофиркон туманидаги 2 йилдан буён солиқ қарзини тўламай келаётган нон ва нон маҳсулотлари ишлаб чиқаришга ихтисослашган «Боғи афзал нурли келажак» ишлаб чиқариш корхонасининг ижро ҳужжатига асосан 80 миллион сўмлик солиқ қарзи шу куни ишчи гуруҳи томонидан нақд пул кўринишида ундириб олинди.
«Тадбир давомида тумандаги бошқа шу турдаги 10 дан ортиқ тадбиркорлар ҳам жами 28 миллион сўмдан ортиқ солиқ қарздорликлари ихтиёрий тўлаб берилмаган тақдирда мол-мулки хатланиб олинишини билгач, шу куннинг ўзида солиқ қарздорликларини тўлаб қўйди», — дейилади хабарда.
Маълумот ўрнида айтиш керак, жорий йил май ойининг ўзида вилоятдаги қарздор хўжалик юритувчи субъектларнинг 2 миллиард 760 миллион сўмга яқин солиқ қарздорликлари ундирилди.
Жорий йилнинг ўтган 5 ойида эса вилоятдаги солиқ қарзи мавжуд корхоналарнинг 110 миллиард сўмга яқин солиқ қарздорликлари ундирилиб, ушбу маблағлар бюджет ва бюджетдан ташқари мақсадли жамғармаларга ўтказиб берилди.
Изоҳ (0)