Бразилиянинг Манаус шаҳридаги қамоқда 26 май куни содир бўлган тартибсизликлар оқибатида 15 нафар маҳбус ҳалок бўлди. Бу ҳақда «ТАСС» хабар берди.
Маълум бўлишича, воқеа кундуз куни, маҳбуслар қариндошлари ташрифи учун ажратилган соатда содир бўлган. Қамоқхона ходимлари тартибни тиклашга муваффақ бўлган, турмадан қочиш ҳолатлари қайд этилмаган.
Воқеа сабаблари ўрганилмоқда. Қамоқхонага кириш вақтинчалик чекланган.
Хабарда айтилишича, 2017 йилнинг январида ҳам шу қамоқхонада ғалаён кўтарилган. Оқибатда маҳбусларнинг 56 нафари ҳалок бўлган, қарийб 130 нафари қочиб кетган. Унда тартибсизликлар 17 соат давом этган.
Ҳозирда Бразилия қамоқхоналарида 730 мингдан ортиқ маҳбуслар жазони ўтаётган бўлиб, бу уларга ажратилган жойдан 50 фоиз кўп. Маҳбусларнинг қониқарсиз шароитда сақланаётгани кўпинча тартибсизликлар келиб чиқишига олиб келган.
Изоҳ (0)