Контрафакт смартфонларни ҳақиқийсига алмаштириш Apple’га деярли 900 минг долларга тушди, деб хабар берди «РБК». Суд ҳужжатларига кўра, iPhone’лар ёқилмаганлиги сабабли мутахассислар уни дарҳол текшира олмаган. Ушбу фирибгарлик хитойлик фуқаро, Линн-Бентон коллежининг собиқ талаба Цюань Цзян томонидан содир этилган ва у ўз айбига иқрор бўлган.

Цюань Цзян 2016—2018 йилларда Гонконгдан доимий равишда ичида 20—30 тадан сохта iPhone бўлган почта жўнатмаларини қабул қилган. У сохта исмлардан фойдаланиб, кафолат асосида алмаштириб бериш учун смартфонларни Apple’га юборган. Шундан сўнг Американинг асл телефонларини қайта сотиш учун Хитойдаги шерикларига жўнатган.

Прокуратура маълумотларига кўра, икки йил давомида фирибгар Apple’га умумий ҳисобда 2 мингта ишламайдиган сохта смартфонлар юборган. Унинг эвазига эса тахминан 1 500 та ҳақиқий iPhone смартфонларни олиб, уларнинг ҳар бирини тахминан 600 доллардан сотган.

Энди хитойлик фуқаро 10 йилга озодликдан маҳрум этилади ва 2 миллион доллар миқдорида жарима тўлаши керак. Тегров бўйича келишув доирасида Цюань Цзян Apple’га 200 минг доллар тўлашга рози бўлган.

The Washington Post’нинг ёзишича, Apple фирибгарлик ҳақида 2017 йилнинг июлидаёқ шубҳаланган. Ўша пайтда компания ҳуқуқшуноси қурилмани алмаштириб бериш ҳақида 150 та талабнома юборган хитойлик йигитнинг манзилига ноқонуний ҳаракатларини тўхтатишни талаб қилиб хат юборган.

Компаниянинг таъкидлашича, смартфонларни алмаштириш ҳақида Цюань Цзяндан келган талабномаларнинг 1 576 тасини рад этган. Аммо 1 493 та талабнома қаноатлантирилган бўлиб, бу Apple’га 895 минг доллар миқдорда зарар келтирган.