Осиё тарққиёт банки 24 та ультра замонавий электролокомотивларни харид қилиш орқали Ўзбекистон локомотив паркини яхшилаш учун 170 миллион доллар заём маблағларини ажратадиган бўлди, деб хабар беради Spot. Аввалроқ, Ўзбекистон янги локомотивларни харид қилишга 226 миллион доллар йўналтириши ҳақида маълум қилинганди.
Янги локомотивлар жуда тозалиги, ишончлилиги ва йўловчиларга хизмат кўрсатиш сифати сабаб темир йўл тизимининг самарадорлигини оширади.
«Транспорт ва алоқа Ўзбекистон каби денгизга чиқиш йўли бўлмаган мамлакатнинг ўсиши ва ривожланиши учун муҳим омил ҳисобланиб, Ўзбекистонни қўллаб-қувватлаш учун устувор вазифа бўлиб қолмоқда», — дейди ОТБнинг Ўзбекистондаги доимий ваколатхонаси бошлиғи Синди Малвичини.
Ўзбекистонда 4669 километрни ташкил этадиган темир йўл тармоғи мамлакатдаги жами ташилаётган юкларнинг 40 фоизини, ер усти воситалари орқали манзилига етказилаётган одамларнинг 4 фоизини ўз ҳисобига олади.
Ҳозирда мамлакат темир йўл тармоғининг 2350 километри (50 фоиздан ортиқроқ) электрлаштирилган.
Лойиҳа доирасида 24 та электровоз тақдим этилади. Уларнинг 16 таси юк ташувчи поездлар учун мўлжалланган бўлиб, 8 таси йўловчиларни ташишга хизмат қилади. Ушбу локомотивлар йилига 900 минг тонна парник газларининг атрофга чиқишини олдини олади.
2025 йилнинг июнига қадар якунланиши кутилаётган лойиҳанинг умумий қиймати 218,3 миллион долларга тенг, шундан 48,3 миллион доллари Ўзбекистон томонидан ажратилади. Заём маблағлари 2044 йилга қадар қайтарилади. Олинган маблағ фоизлари 66,9 миллион долларни ташкил этади.
Изоҳ (0)