Германиядан машинасида чиққан Тоби Ван Деиснер 12312 километр йўл босиб Самарқандга етиб келди, деб хабар берди Zarnews. Фокусчи оиласи билан Буюк Ипак йўли бўйлаб саёҳат қилиб 10 ой ичида турли мамлакатларда бўлиб, турли халқларнинг яшаш тарзи ҳамда маданияти билан танишишни мақсад қилган эди.
«Ўзбекистонга етиб келганимизга ўн кун бўлди. Бу ерга келгунча 13 та давлатдан ўтдик. Мен Ўзбекистон ҳақидаги кўплаб қизиқарли маълумотларни китобларда ўқиганман. Бу юртни кўриш кўп йиллик орзум эди. Қизиқишларим мени ватанингизга саёҳат қилишга ундади. Турмуш ўртоғим билан Ўзбекистоннинг тарихий обидалари, одамларнинг урф-одатларини кўрдик», — дейди Тобе Ван Деиснер.
Машҳур фокусчи Самарқандга келишдан аввал Нукус, Хоразм ва Бухорода бўлганини ва ҳар бир вилоятнинг табиати ўзгача эканлиги, миллий таомлари ҳам бир-биридан фарқ қилишини таълидлаган.
«Самарқанд ҳақиқатан ҳам жуда гўзал шаҳар экан. Айниқса, бу шаҳарнинг Буюк Ипак йўлида тутган ўрни ҳақида кўп эшитганман. Бу ердаги тарихий обидаларнинг қурилиши, архитектураси ҳар қандай кишини ўзига мафтун этади», — деган у.
Фокусчи самарқандликлар учун ўзининг иллюзия томошаларидан намуналар кўрсатди.
Маълумот учун, Тоби Ван Деиснер Самарқандда икки кун бўлиб, кейин Шаҳрисабзга йўл олади. У ердан Тожикистонга ўтиб Помир йўли орқали Қирғизистонга ўтади. Кейинчалик Қозоғистон, Россия, Монголия, Хитой, Лаос, Камбожа давлатлари орқали 2020 йилнинг январь ойини бошларида Малайзияда бўлишни, у ердан уйига самолётда етиб боришни режалаштиришмоқда.
У 15 йил ичида 50 дан ортиқ мамлакатларга саёҳат қилган.
Аввалроқ фокусчининг Германиядан машинада 66 кун йўл босиб Ўзбекистонга етиб келгани ҳақида хабар берилган эди.
Изоҳ (0)