Ўзбекистонда 11 май куни «Оилавий семизликка йўл йўқ» шиори остида 5 километр масофага фаол юриш ва «Саломатлик стартлари» тадбирлари ташкил этилди. Бу ҳақда «Дарё»га Соғлиқни сақлаш вазирлиги матбуот хизмати маълум қилди.
Эрта тонгдан мамлакатнинг барча ҳудудларида бўлгани каби пойтахт истироҳат боғлари ва хиёбонларида ҳам вазирлик марказий аппарати, тизимдаги муассасалар, тиббиёт олий ўқув юртлари ходимлари ва маҳалла фаолларининг оилавий жамоалари иштирокида жисмоний фаолликни тарғиб этувчи эстафета ўйинлари, билимдонлар танлови ўтказилди.
— Камҳаракатлилик, кун давомида узоқ вақт компьютерда ишлаш инсон организмида ортиқча вазн билан боғлиқ кўплаб касалликларни келтириб чиқаради, — дейди Аҳолининг соғлом турмуш тарзини қўллаб-қувватлаш ва жисмоний фаоллигини ошириш маркази директори Барно Одилова. — Мазкур хасталикларнинг олдини олиш мақсадида ҳар бир киши кундалик иш фаолиятини жисмоний фаоллик билан бошлаши, яъни тоза ҳавода сайр қилиши, жисмоний машқлар билан банд бўлиши ва албатта соғлом ҳамда тўғри овқатланишга эътибор қаратиши лозим. Зеро, тоза ҳавода сайр қилиш — мушак, юрак-қон томир тизимини мустаҳкамлайди, нафас олиш ритмини ривожлантиради.
Фаол ҳаракатлар танадаги ёғларнинг эриши, шу орқали ортиқча вазндан қутилишига ёрдам беради. Жисмоний фаолиятнинг бундай тури ҳаракатнинг энг хавфсиз усули ҳисобланиб, уни деярли ҳар бир киши — ўсмирдан тортиб, кекса одамгача бемалол бажариши мумкин.
Изоҳ (0)