Интернетда ички ишлар органи ходимларини «фош этадиган» навбатдаги мақола чиқиб, унинг муаллифлари Тошкент шаҳар ИИББ раҳбарларидан бирини айбламоқда, дея хабар берди ИИББ матбуот хизмати.
Журналистлар «аноним манбалар»га таянган ҳолда ички ишлар органи ва криминал элементлар «Молдовадан келган тадбиркорлардан зўрлик билан улуш ундираётганлари» ҳақида ёзган.
Таҳририят вакили Тошкент шаҳар ИИББ матбуот хизмати бошлиғи ўринбосари билан телефон орқали боғланиб, аниқ фактларсиз ёзиладиган барча маълумотлар асоссиз бўлиб, миш-мишдан бошқасига ярамаслиги ҳақида изоҳ олган.
Шунингдек, журналистга хат билан ёки идоранинг сайтига ИИББ ходимларининг ноқонуний ҳаракатларини фош қиладиган материалларни йўналтириш тавсия этилган. Аммо сайтга бу каби бирорта мурожаат келиб тушмаган.
ИИББнинг ёзишича, жорий йил баҳорида одамлардан уларга оддий молни уч баравар нархда сотган молдован миллатига мансуб шахсларга нисбатан чора кўришни сўраган мурожаатлар келиб тушган. Тошкент шаҳар ИИББ ходимлари аҳоли билан профилактик суҳбатлар ўтказиб, қўлдан турли хил моллар харид қилишга шошилмаслик, уларнинг нархини дўконлардан аниқлаштиришни тавсия қилган. Шунингдек, Молдова фуқароларининг ҳаракатларида жиноят таркиби йўқлиги, уларнинг баъзилари тадбиркорлик билан шуғулланиш учун патентга эгалиги айтилган.
Пойтахт аҳолиси 2015—2018 йилларда ҳам Молдовадан келган ўзларини тадбиркор сифатида таништирган шахсларга нисбатан чора кўришни сўраган. Келиб тушган аризалар асосида ўндан ортиқ фирибгарлик фактлари бўйича Житноят Кодексининг 168-моддаси, 169-моддаси («Ўғрилик») бўйича жиноий ишлар қўзғатилган.
Бундан ташқари, чет эл фуқароларига нисбатан Ўзбекистон Республикаси ҳудудида бўлиш қоидаларини бузилганлиги билан боғлиқ фактлар бўйича юздан ортиқ маъмурий баённомалар тузилиб, 500 нафарга яқин Молдова фуқароси республикадан чиқариб юборилган. Солиқ органлари ходимлари Тошкент шаҳар ИИББ билан ҳамкорликда ўтказган тадбирлар натижасида Ўзбекистон Республикаси солиқ қонунчилиги бузилганлиги бўйича юздан ортиқ факт аниқланган.
Таъкидланишича, Молдова фуқароларнинг баъзилари ноқонуний фаолият юритиш мақсадида, маиший техника ва бошқа уй анжомларини бир неча баравар қиммат нарх эвазига сотиш учун келишларини пойтахт аҳолиси тушунган. Молдова фуқаролари ўша мақолада баён қилинган «аноним тадбиркорлар»дир.«Исбот-далиллар йўқ экан, интернетда чиқарилган матндаги ички ишлар органи ходимларининг ҳуқуқбузарликларга алоқадорликлари тўғрисидаги айбловлар асоссиз ҳисобланиб, миш-мишлардан бошқа нарса эмас», — дейилади ИИББ хабарида.
Изоҳ (0)