Германияда UzWaterAware лойиҳаси томонидан ташкилланган стади-тур иштирокчилари Berliner Wasserbetriebe компаниясининг сув тозалаш тизими билан танишишга таклиф қилинди. Бу ҳақда «Дарё» вакили Алишер Азимов хабар бермоқда.
163 йиллик тарихга эга станция раҳбарига кўра, илгарилари истеъмол учун дарё ва кўл сувлари олинган бўлса, ҳозирда фақат қудуқ сувидан фойдаланилади. Уларнинг чуқурлиги 30 метрдан 170 метргача.
Йил давомида 350 миллион кубометр сув олинади. Берлин кунига 550 минг куб сув истеъмол қилади. 1 киши сарфланадиган сув меъёри 110 литрни ташкил этади. Таққослаш учун, Тошкентда бу кўрсаткич 160 литрга тенг.
Марказий Осиё давлатларида сув асосан қувурларнинг ёмон ҳолати туфайли йўқотилади ва исроф бўлади. Германияда бу кўрсаткич 5, Ўзбекистонда эса 50 фоизга тенг.
Немис мутахассислари томонидан фойдаланиладиган технологиялар истеъмол сувининг сифати савдо нуқталарида қадоқланган ҳолда сотиладиган сувдан тоза бўлишига имкон беради.
Танишувнинг кейинги нуқтаси Берлиндаги энг йирик Ruhleben тозалаш станцияси бўлди.
1963 йилда ишга туширилган ушбу иншоотга ҳар куни 8 дан 15 тоннагача органик бўлмаган қаттиқ чиқиндилар олиб келинади.
Бу ерда тозаловнинг икки — механик ва биологик турлари қўлланади. Шунингдек, чиқиндилар печда 750 дан 850 даражагача ҳароратда куйдириш йўли билан ҳам термик утилизация қилинади.
Берлин тозалаш иншоотларига махсус экскурсиялар уюштирилмайди, улар фақат ўқувчилар ва талабалар учун махсус ўтказилиши мумкин. Маълумот учун, Ruhleben станцияси фаолияти билан танишиш учун йилига 1000 га яқин киши келади.
UzWaterAware лойиҳаси Марказий Осиё минтақавий экология маркази (МОМЭМ) томонидан Европа Иттифоқи кўмаги билан амалга оширилмоқда. Лойиҳанинг миллий ҳамкори — Сув хўжалиги вазирлиги.
Изоҳ (0)