«Ғаройиб Халк» ва «Мўъжиза-аёл» сериалларини суратга олиш жараёнида қатнашган режиссёр Бэрри Крэйн 1985 йил 5 июль куни Лос-Анжелесдаги ўз уйида ўлдириб кетилган эди. Крэйннинг уй хизматчиси уни уйнинг гаражидан, бўғиб ўлдирилган ҳолда топган. У нима учун ўлдирилгани ҳамон номаълум, деб ёзади Meduza. Полиция маълумотига кўра, уйдан режиссёрнинг автомобили олиб қочилган.
Крэйннинг ўлимидан сўнг орадан 30 йилдан кўпроқ вақт ўтиб, АҚШ Федерал тергов бюроси (ФТБ) агентлари уни ўлдиришда гумон қилинган шахсни топди. 9 май куни Шимолий Каролинада 52 ёшли маҳаллий фуқаро — Эдвин Хиэтт қўлга олинган, дея хабар бермоқда The New York Times. Уни ўзи ишлайдиган таъмирлаш устахонасида ушлашган. Полициядан маълум қилишларича, яқин бир неча кун ичида гумонланувчини Шимолий Каролинадан Лос-Анжелесга кўчириш кутилмоқда.
FTБ агентлари гумонланувчини ДНК намуналари таҳлили ёрдамида топган. Экспертлар 2018 йили Бэрри Крэйннинг автомобилидан топилган бармоқ изларини Эдвин Хиэттники билан қиёслаб кўрган. Қотиллик билан алоқадорликни тасдиқлаш учун тергов иштирокчилари Хиэтт ташлаб юборган бир неча тамаки қолдиғи ва у тегинган бир марталик қаҳва идишини унинг ўзига билдирмай олган.
2019 йил мартида Хиэттнинг уйига полициячилар келган — Лос-Анжелес полициясидан маълум қилишларича, суҳбат давомида у қотиллик қилганини тан олган. 9 май куни, уни қамоққа олиб кетишаётганида эса Хиэтт журналистларга эҳтимол режиссёрни ўлдирган бўлиши мумкинлигини, ўша вақтда гиёҳванд моддалар қабул қилганини айтган. Лекин у ҳужум қилиш жараёнини эслай олмаган, Крэйнни ҳам суратидан таний олмаган. 1985 йилда Хиэтт 18 ёшда бўлган.
Режиссёр, сценарийнавис ва продюсер Бэрри Крэйн кино ва телевидениедаги фаолиятидан ташқари АҚШда профессионал бридж (қарта ўйини тури) ўйинчиси сифатида ҳам танилган эди. У мазкур ўйин бўйича 13 бор АҚШ чемпиони бўлган, бридждаги энг яхши ўйинчилар рейтинги эса унинг номи билан аталади.
Изоҳ (0)