Украина президенти этиб сайланган Владимир Зеленский Пётр Порошенкони Миср меҳмонхонасини тарк этиш олдидан шиппак ва сочиқни ўғирлайдиган сайёҳга қиёслади. Бу ҳақда «РИА Новости» хабар бермоқда.
NewsOne телеканали орқали эфирга узатилган мурожаатида, Зеленский Порошенко фақат ўз манфаатлари йўлида ҳаракат қилаётгани ва Украина ҳукмрон доираларида фаол ўзгаришларни амалга ошираётганини, хусусан, Миллий телерадиоэшиттиришлар кенгаши раҳбарлигига, Олий суд судьялари лавозимларига «ўз одамлари»ни қўйишга, шунингдек, алоҳида зобитларга генераллик унвонларини беришга уринаётганини таъкидлади.
Зеленский депутатлардан унинг инаугурациясини 19 майга белгилашни талаб қилди. Янги сайланган президентнинг таъкидлашича, бу — халқ истаги, Олий Рада (Украина парламенти) аъзолари эса, ўз қасамёдларига мувофиқ, фақат ва фақат халқ манфаати йўлида ҳаракат қилишлари лозим.
«Бу менга Миср меҳмонхонасидаги сайёҳни ёдга соляпти: эртага уйга кетиш керак, жомадонлар тайёр, хона йиғиштирилган ва бундай ҳолатда тарбияли инсон аэропортга трансферни кутади. Лекин Порошенко эмас. У ҳеч тўхтай олмай, сочиқ, шиппаклар ва шведча дастурхондаги ҳамма егуликларни ўзи билан олиб кетмоқчи бўлади. Сиздан ўтиниб сўрайман: калитни топширинг, мини-бар учун ҳисоб-китоб қилинг-да — олға! Ҳали олдинда божхона ва паспорт назоратидан ҳам ўтишингиз керак», — деди Зеленский.
Ўз навбатида, Порошенко маъмурияти янги сайланган президент ўз ваколатларини бажаришга киришгунига қадар мамлакатдаги вазият учун амалдаги давлат раҳбари масъул эканини эслатиб ўтди. «Украина — жаноб Зеленскийга кўринганидек Миср меҳмонхонасидаги бир хона эмас», — дейилади маъмурият баёнотида.
Порошенко сўнгги кунларда бир қатор лавозим тайинловларини амалга оширди. Хусусан, Миллий гвардия раҳбари, Донбассдаги ҳарбий операция қўмондони ва Президентни қўриқлаш хизмати бошлиғини алмаштирди, Олий аксилкоррупциявий суднинг 38 нафар судьяси ва Украина Миллий хавфсизлик кенгашининг янги аъзосини тайинлади. Бундан ташқари, Украина Хавфсизлик хизмати раҳбари Василий Грицакни «Украина қаҳрамони» унвони билан тақдирлади ва бир қатор ҳарбий хизматчиларга генераллик унвонларини топширди.
Зеленский инаугурацияни 19 май куни ўтказишни талаб қилмоқда. Бироқ «Пётр Порошенко блоки» фракцияси тантанали маросимни 1 июнга белгилашни таклиф қилмоқда. Янги сайланган президентнинг қасамёд қилиш маросими айнан қачон ўтказилиши Олий Раданинг 14 май куни очиладиган ялпи ҳафталигида маълум бўлади.
Изоҳ (0)