Самарқандда «Электр тармоқлари ва монтаж ишлари» МЧЖ ходимлари хизмат вазифаларини суиистеъмол қилаётгани аниқланди. Бу ҳақда вилоят Мажбурий ижро бюроси бошлиғининг биринчи ўринбосари Бурҳон Ҳайдаров маълум қилди, дея хабар беради Zarnews.
Улар ўзаро тил бириктириб, истеъмолчи Адаш Худайқуловдан электр энергиясидан ноқонуний фойдаланганлик ҳолатини расмийлаштирмаслик эвазига 300 минг сўм пора талаб қилган. Бу ҳолат бўйича А.Худайқулов вилоят МИБга ариза билан мурожаат қилди. Тезкор гуруҳ ходимлари томонидан далилий ашёлар йиғилиб, жиноий иш қўзғатилди.
Шунингдек, Пастдарғом туманида яшовчи бир гуруҳ фуқаролар «Пастдарғомтумангаз» корхонаси участка нозирларининг хурмача қилиқлари хусусида МИБга мурожаат қилди. Ўрганиш давомида участка ходимлари фуқаро Рашид Ишоновни табиий газдан қарзи борлиги, бу қарзни тўламай юрганлиги боис катта жаримага тортилиши ва газ тармоғидан узиб қўйишларини айтган.
Улар қарздорликни компьютер ҳисобидан чиқариш учун 2 миллион 352 минг сўм «хизмат ҳақи» талаб қилган.
Бу ҳолат мутахассислар ҳамда ҳуқуқни муҳофаза қилувчи идора ходимлари иштирокида фош этилди.
Изоҳ (0)