Жорий йилнинг март ойи бошида сайтимиз орқали «Бу ахлатлар орасидан чақалоқ жасади ҳам топилган» Ёҳуд Андижон шаҳридаги «Исботли тиббиёт» хусусий клиникаси ёнидаги чиқиндилар уюмига назар» номли танқидий мақола эълон қилинган эди. Унда Андижон давлат тиббиёт институти қаршисида жойлашган «Исботли тиббиёт» хусусий клиникаси ёнидаги чиқиндилар уюми тўғрисида фикр юритилганди.
Орадан икки ой вақт ўтгач, мазкур ҳолатни ўрганиш мақсадида яна Андижон шаҳрининг «Гумбаз» МФЙ ҳудудидаги «Оҳунбобоев» кўчасида бўлдик. Бу гал ҳам ўша эски манзарани ва икки нафар лўли аёлнинг ахлатлар орасида юрганини кўриб, ажабландик. Уларга ўзимизни таништиргач, бир қанча саволларимизга жавоб олиш мақсадида суҳбатга тортдик.
«Бу ерга кўп йиллардан бери келамиз, — дейди ўзини Малика, дея таништирган аёл. – Чиқиндилар орасидан елим идишлар, қоғоз, қути ва шунга ўхшаш эскирган буюмларни излаб, топамиз ва керакли жойларга сотиб, тирикчилик қиламиз. Maxсус машиналар жуда узоқ муддатда бир келиб, ахлатларни чала ҳолатда йиғиштириб кетади. Шу атрофда яшайдиган аҳолининг кўпчилиги уйидан олиб чиқаётган ахлатини сиз кўриб турган мана бу кичкинагина чиқинди қутига ташлашга эринади. Бунинг устига айрим одамлар ‘Чала тозалаяпсан, покизароқ қилиш’, дея танбеҳ ҳам беради. Биз бу ахлатлар ичида юрганимизга бировдан ойлик олмаймиз ва озодаликни сақлашга ҳам жавоб бермаймиз. Агарда шу яқин атрофга махсус ахлатхона қурилса, яхши бўларди. Аҳоли ҳам чексиз қувонарди».
Лўли аёллар билан суҳбатлашаётган пайтимиз чиқиндиларнинг бадбўй ҳиди, пашша ва чивинларнинг ҳужумига базўр чидадик. Кунини шу ерда рўзғор ташвишида ўтказаётган лўлиларнинг сабрига эса қойил қолдик.
Ҳар куни ўнлаб беморларни қабул қилувчи тўрт қаватли тиббиёт маскани ёнгинасидаги ушбу манзарага муассаса раҳбарияти мум тишлаб ўтирганига ҳайратландик. «Гумбаз» МФЙ вакиллари, экологияни асраш борасида ташкил этилган бир қанча давлат ва нодавлат ташкилот раҳбарлари қачон бу ахлатлар уюмини бартараф қилиб, махсус чиқиндихона бунёд этишлари қоронғу. Аммо она табиатнинг қалби оғриб, биз инсонлардан қаттиқ ранжиётгани шубҳасиз.
Мазкур мавзуга яна қайтамиз...
Изоҳ (0)