10 майнинг эътиборга молик янгиликлари — «Дарё» дайжестида.
Ўзбекистон Президенти Шавкат Мирзиёев 10 май куни Тошкентдаги бир қатор объектларни бориб кўрди.
Хусусан, Шавкат Мирзиёев Тошкент шаҳридаги Сузук ота мажмуасига ташриф буюрди.
Сўнг Тошкентнинг Боғистон кўчасидаги янги уйлар билан танишди.
Шунингдек, шайх Муҳаммад Содиқ Муҳаммад Юсуф номидаги масжидни бориб кўрди.
Шундан кейин «Тошкент» автовокзалида амалга оширилган ишлар билан танишди.
Бундан ташқари, Президент Учтепа туманидаги умумтаълим мактаби ва тикувчилик цехини бориб кўрди.
Сўнг Шавкат Мирзиёев Учтепа тумани раҳбарлари, маҳаллалар раислари, зиёлилар, мутасаддилар билан учрашув ўтказди.
***
Жанубий Кореяда юз берган ёнғин оқибатида ўзбекистонлик талаба ҳалок бўлди.
Ўзбекистоннинг Корея Республикасидаги Элчихонаси берган маълумотларга кўра, 9 май куни ўзбекистонлик талабалар Мутал Йўлдошев (1997 йилда туғилган) ва Фарруҳ Мўминов (1996 йилда туғилган) бўлган Сеул шаҳридаги квартирада маҳаллий вақт билан тахминан соат 14:30 да ёнғин содир бўлган. Натижада Фарруҳ Мўминов воқеа жойида вафот этган.
***
Бектемир туманининг Ҳусайн Бойқаро кўчасида жойлашган қуюв-механика заводи ҳудудида 10 май куни ёнғин содир бўлди.
Маълум бўлишича, ёнғин цистернадан мазут ёқилғиси тўкилиши оқибатида келиб чиққан. Ўт ўчирувчиларнинг тезкор ҳаракатлари туфайли ёнғин бартараф этилган.
Кейинроқ «Ўзбекистон темир йўллари» АЖ қуюв-механика заводида юзага келган ёнғин ҳақидаги хабарни рад этиб, ёнғин завод ёнида жойлашган саноат объектларидан бирида содир бўлганини маълум қилди.
***
Бухорода тўрт киши Қрим-Конго касаллигига чалингани тўғрисидаги хабарларга аниқлик киритилди.
Касалликнинг келиб чиқиши сабаблари ўрганилганда, беморларнинг барчаси чўл ҳудудларида чорва молларини боқиш ва уларни парвариши билан шуғулланиб келган фуқоролар эканлиги маълум бўлган. Қрим-Конго геморрагик иситма касаллиги уларга кана чақиши, канани ҳимояланмаган қўллар билан чорва молларидан олиб, эзиб ўлдирилиши ва қўй қирқим вақтида кана чақиши орқали юққанлиги аниқланган.
***
Ўзбекистонда исмли авторақамларни жорий этиш таклиф қилинди.
Қайд этилишича, мазкур турдаги авторақамларни сотиш давлат бюджетига ҳам маблағларни туширишга хизмат қилади. Аксарият ҳолатларда йўл ҳаракат қоидаларини қўпол тарзда бузиш ёки эҳтиётсизлик натижасида пиёдани уриб юбориш ва воқеа жойидан қочиб кетиш ҳолатларида бундай автомобиль рақамлари зарур ҳисобланади. Кузатув камералари ўрнатилмаган жойларда шундай ҳуқуқбузарлик ёки жиноятлар содир этилганда фуқаролар рақамлардан кўра сўзларни яхшироқ эслаб қоладилар.
Изоҳ (0)