Қорақалпоғистон Республикасининг Мўйноқ туманида казино (ўйин бизнеси) ташкил этиш лойиҳаси ваколатли органлар томонидан кўриб чиқилмоқда. Бу ҳақда Давлат туризм қўмитаси раисининг биринчи ўринбосари Улуғбек Қосимхўжаевга асосланиб, «Podrobno.uz» хабар берди.
«Мўйноқда махсус ўйин зонасини ташкил этиш лойиҳаси ваколатлари органлар томонидан кўриб чиқиляпти. Бу ёғи бизга боғлиқ эмас. Улар кўплаб кўрсаткич ва индикаторларни ҳисобга олган ҳолда лойиҳага оид якуний қарорни қабул қилгач, эълон қилинади. Давлат туризм қўмитаси бу каби зонанинг ташкил этилишини ижобий баҳолайди», — дейди Қосимхўжаев.
Қосимхўжаевнинг сўзларига кўра, мазкур ҳолатда зона хорижликлар учун яратилмоқда ва шу сабабли лойиҳа ташаббускорлари унинг хавфсизлиги ва шаффофлигини таъминлаш учун бир қатор жиддий ишларни амалга ошириши лозим.
«Агарда буларнинг барчасига риоя қилинадиган бўлса, биз уни қўллаб-қувватлаймиз. Давлат туризм қўмитаси қайсидир даражада бунга ўзи ташаббус кўрсатди», — дейди у.
Аввалроқ Бош прокуратура Мўйноқда казино очиш эҳтимолининг барча аспектлари ўрганиб чиқилаётганини маълум қилганди.
Изоҳ (0)