7 май куни Repost нашри ўз муштарийлари маълумотларига асосланиб Навоий вилоятидаги перинатал марказда жой етишмаслиги сабабли ҳомиладор ва янги туққан аёллар ерга ётқизилаётгани ҳақида хабар берган эди. Ўзбекистон соғлиқни сақлаш вазирлиги матбуот хизмати «Дарё»га ушбу ҳолат юзасидан изоҳ тақдим этди.
Вилоятнинг барча шаҳар ва туманларида 8 та туғрухона ва 1 та вилоят перинатал маркази мавжуд. Соғлиқни сақлаш вазирлигининг 2014 йилдаги 185-сонли буйруғига асосан Зарафшон шаҳри ва Кармана туманларида ҳудудлараро перинатал марказлари ташкил этилган.
Соғлиқни сақлаш вазирлигининг 2010 йил 31 декабрдаги 378-сонли қароридаги буйруғи билан тасдиқланган «Вилоят перинатал маркази тўғрисидаги Низом»да вилоят перинатал маркази томонидан вилоятнинг туман ва шахарларидан ҳомиладорликнинг 22 ҳафтасидан 34 ҳафтасигача бўлган муддатдан олдинги туғруқлар ва ҳомиладорликнинг оғир асоратли ҳолатлари билан келган ҳомидадорларга тиббий ёрдам кўрсатиши кўрсатиб ўтилган.
Навоий вилоятида яшовчи аксарият аёллар фарзандини перинатал марказда дунёга келтиришни истагани учун марказ томонидан уларга тиббий хизмат кўрсатилиб келинмоқда. (1 йил давомида вилоят перинатал марказида 6000 дан ортиқ туғруқлар қабул қилинади.)
Вилоят перинатал марказининг ҳомиладорлар хасталиги бўлимида бугунги кунда 40 ўрин мавжуд бўлсада, ҳомиладорликнинг асоратлари билан ҳомиладорларнинг кўплаб мурожаат қилиши натижасида 2019 йил 7 май ҳолатида 40 ўринли бўлимда 53 нафар ҳомиладорлар қабул қилинган бўлиб, оқибатда юқорида кўрсатилган ҳолат келиб чиқган ва ушбу ҳолат 1 соат ичида зудлик билан бартараф этилди ҳамда қўшимча ўрин жойлар яратилди.
Бундан ташқари, вилоят перинатал маркази биносида Инвестиция дастури доирасида 18 миллиард 401 миллион сўм маблағларга 2017 йилдан буён қурилиш таъмирлаш ишлари олиб борилмоқда. 2018 йилнинг декабрь ойида марказнинг янги корпуси қурилиб фойдаланишга топширилди ва эски биносида реконструкция ишлари олиб борилмоқда. 2019 йилнинг июль ойида қурилиш таъмирлаш ишлари якунланиб бино тўлиқ топширилиши ҳамда 396,4 минг АҚШ долларига 74 турдаги тиббий жиҳозлар билан таъминлаш режалаштирилган.
Изоҳ (0)