8 май куни ижтимоий тармоқлардаги оммабоп саҳифалар ва мессенжерлардаги каналларда Чирчиқ шаҳрида «Ўлмас полк» тадбири ўтказилганини тасдиқловчи суратлар тарқалди. Чирчиқ шаҳри масъулларининг «Дарё» мухбирига маълум қилишича, ушбу тадбирни ўтказиш учун расман рухсат олинмаган.
Чирчиқ шаҳар ҳокимнинг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Жаҳонгир Маткаримовнинг сўзларига кўра, шаҳар Рус миллий маданий маркази томонидан жамоат тартибини сақлаган ҳолда тадбир ўтказишга рухсат сўралган. Сўровда алоҳида «Ўлмас полк» ўтиши кўрсатилмаган эди.
«Бугун, 8 май куни Чирчиқ шаҳрида 9 май — Хотира ва қадрлаш кунига бағишланган байрам тадбирлари бўлиб ўтди. Байрамдан сўнг шаҳар Рус миллий маданий маркази вакиллари 50 дан ортиқ иштирокчи билан пиёдалар йўлакчаси орқали юриш қилди. Лекин ‘Ўлмас полк’га расмий рухсат берилмаган», — деди Маткаримов.
Қайд этиш жоиз, шаҳарда Хотира ва қадрлаш кунига бағишлаб ўтказилган байрам тадбирида мингдан ортиқ аҳоли вакиллари, шунингдек, шаҳар ҳокими ҳам қатнашган. Тадбир доирасида Чирчиқнинг Алишер Навоий кўчасида ҳарбий парад бўлиб ўтган.
Чирчиқ шаҳар ИИБ вакили берган маълумотга кўра, шаҳарда «Ўлмас полк» тадбирини ўтказиш учун ҳеч қандай рухсат олинмаган.
Аввалроқ Тошкент шаҳрида фаоллар пиёдалар йўлаклари ва тротуарлардан юрган ҳолда «Ўлмас полк» акциясини ўтказмоқчи экани ҳақида хабарлар пайдо бўлганди, бироқ пойтахт ҳокимлиги шаҳарда ҳеч қандай «Ўлмас полк» акцияси ўтказилмаслиги, бунинг учун рухсат берилмаганини маълум қилди (Тошкентда 2017 ва 2018 йилларда ҳам «Ўлмас полк»га рухсат берилмаган).
«Ўлмас полк» тадбирини ўтказиш анъанаси 2012 йили халқ ташаббуси сифатида Россиянинг Томск шаҳрида бошланган бўлиб, кейинчалик у бутун Россия ва бошқа қатор мамлакатларда ҳам ўтказила бошланди. Маълумотларга кўра, «Ўлмас полк» акциялари Россия давлат идоралари кўмаги ва Россия ҳукуматига яқин жамоат ташкилотлари молиялаштиришида ташкил этилади.
Изоҳ (0)