АҚШ қуролли кучлари ихтиёрида стратегик ташувчиларга ўрнатиб бўлинган 1740 та ҳамда захирада сақланаётган ва ҳозирда омборда бўлган 2050 та ядро каллаклари бор. Бу ҳақда америкалик олимларнинг The Bulletin of the Atomic Scientist илмий журналида эълон қилинган тадқиқотида баён қилинган, деб хабар берди «РБК».
Тадқиқотчиларнинг баҳолашларича, 1300 ядро каллаклари Minuteman III қитъалараро баллистик ракеталарига ва Trident II D5 сув ости кемаларининг баллистик ракеталарига, АҚШ авиабазаларида сақланаётган стратегик бомбардимончи самолётлари 300 ядро бомбаси билан жиҳозланган. Яна 150 та ядро каллаги эса АҚШнинг Германия, Бельгия, Нидерландия, Италия ва Туркиядаги базасида сақланмоқда.
Бундан ташқари, тадқиқот муаллифларининг ёзишича, деярли 2400 эскирган ядро каллаклари жанговор навбатчиликдан олиниб, 2030 йилга қадар утилизация қилиниши лозим.
Ҳозирги кунда ядро қуролларининг сони АҚШ ва Россия томонидан имзоланган Стратегик ҳужумкор қуролларни чеклаш ва қисқартириш борасидаги келишувга кўра тартибга солинади. Унга кўра, қуролларнинг умумий ҳисоби қитъалараро баллистик ракеталар ҳамда сувости баллистик ракета ташувчилари ва оғир бомбардимончи самолётлар учун 700 тадан ошиб кетмаслиги керак.
Шунингдек, Москва ва Вашингтон 1500 тадан ортиқ бўлмаган ядро каллаги, 800 тадан кўп бўлмаган фаол ва нофаол ракеталарга эга бўлиши мумкин.
Дональд Трамп 26 апрель куни ядро қуролидан воз кечмоқчи эканлигини маълум қилган ва Россия билан Хитойни ҳам шундай қилишга чақирган эди.
Изоҳ (0)